Faatali pea tausi soifua i le siitaga o totogi

O le molimau a se tausi soifua, o le afiafi o le Aso Gafua na tea nei na logotala ai i se fono faanatinati a le Komiti Faafoe o le pulega o le Matagaluega o le Soifua Maloloina ma le pulega o le auaunaga faatausi soifua na toe soalaupule ai le mataupu i le siitaga o totogi o alii ma tamaitai tausi soifua poo nurses.

O le taunuuga o le fono e lei logomalie ona sa faia le faaiuga, e lē maua isi masina i le siitaga amata mai i le aso muamua o Iulai o le tausaga nei lea na faatulaga mai e le Malo e tatau ona maua ai. Ua na ona maua o le siitaga e amata i le masina fou o Novema.

Na faaalia e le molimau faatuatuaina, o se iuga na amata ai loa ona tapena le sosaiete e faatino se latou teva poo se strike. 

O le fono faanatinati i le Aso Gafua na tea nei, 24 o Oketopa 2011, e lei auai le Peresitene o le sosaiete ona ua lē mafai ona oo ane ona o loo gasegase i lona maota.

Sa logo i ai le taunuuga o le fonotaga, ma toe ave ai le isi tusi i le pulega o le auaunaga faatausi soifua ina ia tatau ona faatino le siitaga i le masina sa pasia ma ioeina e le Malo, ma a leai o le a lē toe faatali loa le sosaiete i lana fuafuaga i se teva ona sa onosai ina ua lē maua i le masina o Oketopa, ae toe onosai ina ua logo atu o le a faato‘ā maua i le totogi muamua o Novema.

O le afiafi lava o le Aso Gafua na tea nei na toe maua ai e le Peresitene se isi tusi e pei ona faaalia e le molimau, na logoina ai o le a maua le siitaga i le aso 2 o Novema, ae o le a totogi amata mai i le aso muamua o Iulai e oo mai i le aso 2 o Novema. 

“O se tala faafiafia loto lea i le matou galuega ona ua fai si tele o tausaga o finau atu pea ma olo le fua, ae o lea faato‘ā matuu mai se faaiuga e faafiafiaina ai le matou tautua”.

O le feiloaiga a tusitala ma le Itu again a faaalia ai e le fofoga o alii le tofa Lealailepule Rimoni Aiafi, e ofo ile tuai ona maua o le siitaga o tausi soifua ae o se mataupu ua maea ona pasia e le Malo. 

O le tala foi o le tupe mo le tausaga faaletupe o iai nei, ua aofia ai ma le vaega tupe e faatino ai le siitaga. 

“Ou te fia iloa la pe aisea ua tuai ai ona maua, ae ua 4 tausaga o faatali nai tausi soifua”, na saunoa ai le fofoga o alii.

O le finagalo foi o le sui taitai o le Itu agai le afioga A‘eau Peniamina o loo ia finauina ai le Malo ina ia silasila i le mataupu lenei, ona e iai lona talitonuga o le pulega o le matagaluega o loo faatuai ai ona maua le siitaga.

O loo lagolagoina e le Itu agai le faia o se siitaga o totogi mo tagata faigaluega uma o lea matagaluega tele a le Malo, peitai ia faamuamua le siitaga o tausi soifua na muamua talosagaina, aemaise na faaalia e Lealailepule Rimoni, o le faataotoga o le siitaga sa tuuina atu i le Komiti o Tupe a le Palemene sa lelei ona saunia e le sosaiete a tausi soifua ma le pulega o le galuega faatausi soifua.