O le vaiaso lenei e iloa ai poo le ā le tulaga o le a agai i ai le mataupu a le afioaga o Satapuala, i le sala a Vaili Tatupu o loo taitaia le isi vaega o le nuu ma se finagalo o le isi vaega o le nuu e tusa ai ma mataupu ua vaeluaina ai le afioaga.
O le vaiaso talu ai, sa feiloai ai le Minisita o tina ma tamaitai, atina‘e o nuu ma agafesootai, Tolofuaivalelei Falemoe Leiataua ma le itu a Vaili Tatupu e tusa ai ma se tusi sa tuu aloaia atu e lea vaega i le alii Palemia mo se faaiuga e aloaia ai la latou faiganuu ona e lē o toe faaaogāina e le Malo tofiga a le nuu o loo iai nei, lea o loo aofia uma i lalo o le faiganuu o loo taitai ai Vaili Mimita.
O le mae‘a o lea feiloaiga sa fautuaina ai lea itu o le nuu ina ia toe agai i tua i le afioaga ina ia toe talanoa ma faalelei ona o le agaga lea o le Malo.
Peitai, na ta‘ua e Vaili Tatupu, sa feiloai i le mae‘a ai o le faaiuga a le faamasinoga mo se feiloaiga ae e leai se tulaga o iloa ai o malilie le isi itu mo se faaleleiga ma o le ala lea o le faaauau pea o la latou faiganuu fou ua iai nei.
O le mataupu na faasala ai Vaili Tatupu e le nuu, na mafua mai i le faamasinoga o le suafa To‘alepaialii lea na faapea mai le nuu, sa ia lafo ai ni lafoga ua oia ai le faavae o le afioaga ma faasala ai loa i le $5,000 tala.
“O le faaiuga a le faamasinoga, ia toe agai itu e lua e talanoa ma feiloai ona faato‘ā toe oo atu lea o le mataupu mo se isi faaiuga a le faamasinoga,” o se saunoaga lea a Vaili Tatupu.
Faaalia e Vaili Mimita i se faatalatalanoaga i le vaiaso nei, e lē o se faaiuga lea na aumai e le faamasinoga.
“O le faaiuga a le faamasinoga, ia faataatia atu le mataupu i le nuu, e toe Iloilo ai le faasalaga ua faasala ai Vaili Tatupu,” o se saunoaga lea a Vaili Mimita.
Na ia ta‘ua foi, ua tasi le nuu e pa‘ū le faasalaga, ma o lea la ua pa‘ū ai i le $4000 tala, ma seiloga e faatino lea sala, ona mafai lea ona toe foi ane i totonu o le faiganuu.
O le tofi pulenuu o Satapuala, o loo umia pea e Ga Sakaria ma na ta‘ua e Vaili Mimita, o loo faaauau pea le tofi o Ga i le taimi nei se‘i vaganā ai le tulaga i le leai o sona totogi i le taimi nei.
Saunoa Vaili, o le isi feiloaiga a le nuu ma i latou ua o ese, o le a faamoemoe lava i le agaga o le Atua na te faia se faaiuga talafeagai mo le agai i luma o le afioaga.
Ae na manino lava i se faatalatalanoaga ma le afioga ia Vaili Tatupu, afai lava o le ā le finagalo o le nuu i le itu o loo finau atu ai ae e lē talia, o le a tumau pea e fai le latou faiganuu fou ua iai nei ona e manumanu foi i le lumanai o alo ma fanau.
