O le finauga pe agavaa le sui tauva o le Tautua Samoa o Fiaola Lole i le aiaiga e tolu tausaga e tatau ona nofo ai i Samoa ona faato‘ā mafai lea ona avea ma sui tauva i le sailiga o tofi faipule o le Palemene, o le a suesueina i le Aso Lua, 8 o Mati 2011.
O le Aso Lulu ua mavae, 2 o Mati 2011 sa tuu e suesueina ai le talosaga a Fiame Naomi, peitai o le lei saunia o le itu a Fiaola Lole ma lana loia, faapea le itu a le Komesina o Faigapalota o loo tulai ai loia a le Malo mai le ofisa o le Loia Sili, na lē faataunuuina ai le finauga.
E lei atoa aso o Fiaola lea fai mai le tulafono o faigapalota e lē itiiti ifo i le 240 aso e tatau ona nofomau ai se tagatānuu o Samoa i totonu o le atunuu ona agavaa lea. Peitai o le faaiuga a le Komesina o Faigapalota na faamaonia ai le agavaa o Fiaola Lole, ma o le isi lea o itu o loo faasaga i ai le talosaga a Fiame Naomi.
Peitai na ta‘ua e le loia a le Malo o le pisi ma le tele o galuega a le Komesina o faigapalota ua lē gafatia ai ona oo ane i le faamasinoga, aemaise a fua i le Aso Lulu na suesueina ai le talosaga, e sosoo ma le Aso Tofi, ae fai le palota i le Aso Faraile, 4 o Mati.
Sa finau le loia a Fiame e iai vaega tāua e tatau ai ona silasila le faamasinoga i le ave o le faamuamua i le finauga ina ia tatau ona faataunuu.
Peitai o le talosaga a le loia a Fiaola Lole ina ia faaleaogā le talosaga atoa a le itu tagi poo le strike out motion e lei lava tapena i ai se tali.
O itu ia na silasila i ai le faamasinoga ma faia ai loa le faaiuga e sili pe a taatia, se‘i mae‘a le palota. Pe afai e manumalo le Sa‘o Faapito, e iai le talitonuga o le a faaauauina lenei finauga, ae afai ae manumalo Fiaola e faaauau lava.
O le isi lea fesili a le Faamasino Sili le afioga Patu Tiavaasu‘e Falefatu Sapolu i le loia a le Malo ma le loia a le sui tauva o le Tautua Samoa, pe afai e lē maua e lē o loo talosaga poo le afioga i le Sa‘o Faapito le ‘afa o palota a Fiaola pe afai o le a manumalo, pe faamata e mafai lava ona finauina le mataupu.
Peitai na faaalia e le loia a le Malo e talafeagai lava pe afai lea e faatutu le talosaga i le Komesina o Faigapalota ma lana faaiuga na faamaonia ai le agavaa o le sui tauva i le aiaiga o le atoa o le tolu tausaga o nofo i Samoa.
O le a lē mafai ona tagofia pe afai o se tagi e mafua i le faiga palota ona pe afai e lē ausia e lē o loo tagi le ‘afa o palota manumalo.
O lona uiga e iai le isi auala e mafai ai ona faatoai le mataupu i le faamasinoga mo le suesueina pea o le tulaga agavaa i lalo o aiaiga o le tolu tausaga. Faaalia e Fiame o lona naunau e faia le amiotonu o le tulafono na tuuina atu ai le mataupu a o loma le faamasinoga, ae lē o se faapea ua iai sona popolega ina ne‘i lē toe filifilia o ia e lona itumalo.
O le tausaga e 1988 ina ua mae‘a se tasi o faiga palota tele a le atunuu sa tuuina atu ai foi e le afioga Fiame Naomi se tagi i le faamasinoga na fesiligia ai le tulaga agavaa o se tasi o sui tauva sa la tausinio, ona e lei lesitalaina faaletulafono lona matai na tauva ai. Na faia le faaiuga a le faamasinoga ma faaleaogāina ai le filifilia o lea sui tauva ina ua maua ane e lei lesitalaina lona matai.
