Ua faatali nei le afioga Sala Sio Tipasa, o le pule aoga a le Aoga maualuga o Sagaga i se suesuega a le Ofisa Leoleo i le mae‘a taulima ai o se tusi e faamaonia ai le tagi ua tuu atu e le Komiti a le Aoga a lea itumalo.
O le tagi ua faaalia e le Faipule a Sagaga Le Usoga, lea e teutupe ai i le Komiti a le Aoga e le na o ia na avea i Leoleo. O le tagi na faia ona o le finagalo autasi lea o le Komiti. “O lea foi ua faapea le toatele o le faipule ua alu fai le tagi, e leai,” o se saunoaga lea a le Afioga Muagututagata Peter Ah Him ina ua tapa i lenei tagi.
“A e silasila lelei lava i le tagi e pei ona tauaao atu i le Pule aoga, o loo saini ai le Taitaifono o le Komiti le toeaina o Vou Oliva ma na ala lava ona ou saini ai i le tagi ona o a‘u lea e teutupe,” o le faamatalaga lea a Muagututagata.
O le faamatalaga a le alii Pule aoga, ua faateia o ia i le tusi ua taulimaina ae na mafua ona tulai mai feeseeseaiga ma le teutupe o le Komiti ona ua ia fesiligia tala o le tupe a le aoga.
“Ua silia ma le 10 tausaga e leai se tala o le tupe, silia ma le 10 tausaga e leai se tusitupe a le Aoga ma ua silia i le 10 tausaga o teu pili aoga a le Kolisi i le atigi pusa,” o le faaaliga lea a le Pule aoga o Sala Sio Tipasa.
Faaalia e Sala Sio, o lana tusi na ave ina ua tulai mai feeseeseaiga ma suesuega o pili aoga a le fanau ina ia faatonu e le Komiti le Teutupe, le alii faipule foi lea, e toe totogi atu se tinoitupe e tusa ma le $160,000 (Tala Samoa) lea e leiloa poo fea ua faaaogā i ai.
O le faamatalaga a le alii Pule aoga, o le vaitaimi o le 1990 na amata galue ai o se faiaoga i Sagaga ma ua tolu tausaga talu ona ia umia le tofi Pule aoga.
Mai i lea taimi atoa o le aiaiga lava o pili aoga a le fanau e ao e le Komiti, ma o inā e agai i ai le Pule aoga ma faiaoga e saili mai ai seleni e faatautaia ai galuega moomia o le aoga.
Peitai o lea ua iu lava ina tapunia le aoga lenei a Sagaga, e tasi lava le taimi na avatu ai e le Komiti le faatagaga e agai ai le Pule aoga e faaaoga se tupe mai i pili o le fanau e fausia ai se paipa e fafano ai lima o tamaiti i le mae‘a ai ona faaaogā o fale lē ta‘ua.
O le faatonuga lea na faia i le amataga o lenei tausaga ina ua taunuu atu se asiasiga a le Matagaluega o le Soifua Maloloina ma faatonuina le tapunia o Sagaga mo ni nai vaiaso se lua seia faamae‘a le sink lea e pei ona faatonuina.
E tusa ma le $240 le tupe na ta‘ua e le teutupe na alu i le galuega lea ae to‘a 45 tama ma teine aoga ia ua faamaonia mai na ao e le Pule aoga o latou pili.
O le tagi la lea ua faaauala tonu lava i le aoina o pili a le fanau aoga i le tausaga lenei, ma o se gaioiga na ta‘ua e le Teutupe e le mafai ona toe talanoa mai ai ona o lea ua i lima o leoleo le mataupu.
Ae ina ua fesiligia i le tuuaiga ua sauni nei le alii Pule aoga e tau i leoleo, na ta‘ua e le Afioga Muagututagata ua ese lava le mataupu lea ua agai i ai le Pule aoga ma o lea ua pasia le tala o le tupe a le Aoga i le sefulu tausaga ua tuanai, ae na o le Pule aoga lava ma le failautusi o le Komiti na teena le tala o le tupe.
O le o ese ai o le aoga a Sagaga mai i le nofoaga sa iai i Tuanai, na ta‘ua e Muagututagata ua mafua ona ua iai le manaoga o le tamalii e ana le fanua na fau ai le aoga, e aveese le aoga ma ua malilie foi le Komiti ona o le itu lea e tu i luga o le sami le faleaoga, ma a oo i taimi leaga o le tau e mautinoa lava le afatia o le faleaoga, ma ua malilie foi la e saili se isi nofoaga e ave i ai le silia i le to‘a 300 o tama ma teine aoga i lenei aoga maualuga.
O le amataga lava o le aoga a Sagaga na fausia i Saleimoa, ae na faaaogā foi ia fanua ae sii mai le aoga i Tuanai, ae o lea foi la ua agai ese ma o le taimi lenei o maota ma laoa o le afioaga o Leauvaa ia ua faatautaia ai aoga a le fanau.
“O lea ua talia e se tamalii mai i Faleula, o Telea Tuna se vaega o lona fanua poo le fanua o lona aiga auā le fausia ai o le faleaoga fou a le Aoga o Sagaga, ma e faafetaia ai foi le faaiuga a lea tamalii,” o se faaaliga lea a le alii faipule.
Ua tele galuega faataatitia a le Komiti aemaise foi o le Pule aoga ma le vasega o faiaoga mo le faaauau ai o le aoaoga o fanau a Sagaga, lea e aofia ai fanau mai i Tufulele seia paia Faleula, o Sagaga Le Usoga faapea Sagaga le Falefa o loo iai uma i lenei aoga atoa ai ma fanau a Leauvaa, ma o se aoga tāua i le toatele o loo nonofo ai i lea itu o le Tuamasaga.
Ae o le feeseeseaiga i le va o i laua nei o le a faapea ona faatuai ai foi fuafuaga ua manatu itu uma e lua ua talafeagai mo le fanau.
