“Tu loa le pelu i le papatua o mai loa”…Tuilaepa L Sailele Malielegaoi
Ua faatalitali nei le Malo o Samoa i se tali maoti mai le pulega o le StarKist i Amerika Samoa poo afea o le a faataunuu ai loa le latou fuafuaga mo le faatuina o se nofoaga e fasi ma vaevae ai le i‘a ona la‘u lea o ogai‘a i le kamupani i Tutuila e tuuapa ai.
E 1,200 tagata i Samoa o le a mafai ona galulue i lea taumafaiga a le kamupani pe a taunuu.
Faaalia e le Palemia, Susuga Tuilaepa L Sailele Malielegaoi, e lē o se taimi muamua lenei ua feutagai ai le Malo ma le pulega o lea kamupani tele i Amerika.
“E lē o se taimi muamua lenei, auā o taimi ua alu sa o mai ona avatu lea o fautuaga ae te‘i ua o ma faaaogā mo latou, ae o le taimi nei la ina ua tu le pelu i le papatua ona ua sii maualuga le totogi maualalo mo tagata faigaluega i Amerika e lavea ai ma Amerika Samoa, o lea la ua o mai mo‘i”.
Na ta‘ua e Tuilaepa e tele avanoa faigaluega mo tagata i Samoa o le a maua i lea taumafaiga ae o le a toe iai se isi feiloaiga i le lumanai ma sui o le kamupani ona iloa ai lea pe taunuu pe leai.
O Asau i Savaii o loo faamoemoe le kamupani e fausia ai se nofoaga mo le faia o galuega i le faamamāina ma le vaevaeina o le aano o i‘a, tia‘i ese le ulu ma isi vaega ae tuuaisa na o ogai‘a e la‘u i Tutuila e tuuapa ai.
Ua mae‘a ona asia le uafu i Asau ma ua faafiafiaina le pulega o le kamupani i le nofoaga lea.
O le faamoemoe foi lea ua faaalia ai e le Minisita o uafu le afioga Tuisugaletaua Sofara Aveau o le a toe faatelē ai le ava e ofi ai i totonu vaa mo le faaaogāina e vaa fagota e afea le uafu i Asau.
Faaalia e Tuilaepa o le a tumau lava le totogi maualalo o loo iai nei mo ni tagata o le a faafaigaluega e lea kamupani i Samoa.
O se fuafuaga faataoto mo le taimi nei ae o loo iai le naunautaiga o le Malo ia taunuu ona tino mai lea faamoemoe auā o se atina‘e tāua tele pe a taunuu o le a maua ai galuega.
O feutanaiga i le va o le Malo Samoa ma le kamupani ua faaalia e se sui o le faigamalo a Amerika Samoa o loo mataitu lelei e le faigamalo a Tutuila ma Manu‘a.
E mafua lea tulaga ona o loo iai se talosaga a le StarKist i le faigamalo a le teritori mo se vaegatupe e faaleleia ai ana galuega fai mo le faatumauina o lana tautua i le teritori.
O le silia i le lua afe o tagata faigaluega a lea kamupani i Tutuila o alii ma tamaitai mai Samoa Tutoatasi peitai o le isi 600 ma ona tupu o le a vāea ma faamalolo lea ua mae‘a ona faamalolo le isi 300 muamua, ae o Oketopa o le a faatino ai lea fuafuaga i le isi 300 mulimuli.
