Faatali i le Komesina o Leoleo pe faaui i tua le tagi a tina Salelologa

Ua faatonuina e le Faamasinoga Faaitumalo ni sui o le Mafutaga a Tina i Foua Salelologa, e ave le latou talosaga e toe faaui i tua se mataupu na o latou aumai i le faamasinoga i le Komesina o Leoleo. Ua na o ia e maua mai ai le faatagaga o lea tulaga.
O le mataupu lenei o se tagi na faatoai mai e tina o le mafutaga I le tausaga na te’a nei faasaga i se alii e suafa ia Sanele Moananu, o se tagata sa galue i le Ofisa Malaga o le Manoifoa i Apia. Ua tuuaia e tina i le faaaoga o le tupe na ave i ai mo o latou pasese i se malaga na fuafua mo Niu Sila ae lei faataunuuina le tautua na tapa ai lana fesoasoani.
Faaalia i lipoti a leoleo o le tausaga na tea nei lea na fuafua e alu ai lenei malaga ma e tusa ma le toa 20 tina o le mafutaga na aofia ai i lenei faamoemoe. Na fesootai mai le ofisa o femalagaaiga lenei i Apia ma o Sanele Moananu na o latou feagai i le faatamoega o pepa malaga aemaise o latou pasese.
O le aso na tuu e agai ai loa tina i Niu Sila na omai ai mai Savaii ma le tuutuuga o le a feiloai ma Sanele i le Malaevaalele Faavaomalo i Faleolo ona tauaao loa lea i ai o o latou pepa malaga ma faamautu uma ai le latou faigamalaga a o lei tuua le atunuu.
Peitai na fiu tina e tatali se oo atu o se isi o lea ofisa malaga poo le foi na o latou feagai i lenei sauniuniga. E alu lava le vaa o faatali tina ma le faataunuuina ai loa lo latou faamoemoe.
Na mulimuli ane fesootai tina i le alii faipule o le afioaga le Afioga Tiota Pulufana ma o ia lea na tali ane i le augani a tina ina ia totogi o latou pasese ona ua le taunuu a latou fuafuaga.
Na faapea ona totogi e le faipule pasese o tina ae faatoai ane loa ma le tagi lenei a le mafutaga a Foua i le Faamasinoga.
Faaalia e Patrick Fepuleai le alii loia sa fesootai ma le faamasinoga i lenei vaiaso, o le loia e tulai mo Sanele o loo malaga i fafo ma ua le mafai ona auai ane e faaauau le mataupu lea na fuafua e fofogaina i lea aso.
O nei tuuaiga uma e teena e Sanele. Na faia le faaiuga a le Faamasino o le faamasinoga faaitumalo, le afioga Tauiliili Harry Schuster e toe tolopo le mataupu mo le faaauau ai o le iloiloga i le aso 5 o Novema o le tausaga nei lava. Peitai na tulai tina e fai ma sui o le Mafutaga a tina o Foua i Salelologa ma faaali i le Faamasinoga le manaoga o tina e toe faaui i tua le latou tagi.
O le faamatalaga a le tina ia Auvalea, o le taitai malaga foi lea a le mafutaga, ua oo atu le ua molia ma faatoese i le mea na tupu. Ua toe totogi atu foi la se vaega o le pasese lea e tuuaia ai Sanele i lona faaaoga ae ua iai le maliega e togitogi atu le vaega o totoe o lea tupe. O le faamatalaga a le tina, ua malo lo latou manatu faatina e faamagalo ma ia faauma loa lea mataupu. O le ala lea o le oo atu i le faamasinoga, ina ia toe aveese le tagi na aumai i leoleo lea ua tulai ai le ua molia i le faamasinoga.
Faaalia e le afioga i le Faamasino, Tauiliili Harry Schuster, e le mafai e le faamasinoga ona toe faaui i tua se tagi, sei vagana lava ua oo i latou na faatoai mai le tagi i le Komesina o Leoleo.
“Ua na o ia e aumai ai se faatagaga o lea ituaiga talosaga”
Sei vagana foi la ua oo ane se faamaoniga mai le Komesina o Leoleo ua talia le talosaga a le mafutaga a tina, ona faatoa mafai foi lea e le Faamasinoga ona faaui i tua le tagi a tina. O loo taatia lava la le faaiuga ua tolopo ai le mataupu i le aso 5 o Novema mo lona iloiloga a o talia ai e le faamasinoga se finagalo o le Faauluuluga o le matagaluega o Leoleo.