Ua toe a‘e aoga a le Malo ma nisi o aoga a Lotu ae o lea lava e leai ma se galuega toe faaleleia i faleaoga ia na faaleagaina i le afā o Eveni.
E $10 miliona tala le tupe ua ta‘ua e le Matagaluega o Aoga, Taaloga ma Aganuu e moomia e toe faaleleia ai faleaoga e fitu ia na faaleagaina i le afā. Ua mae‘a tapena le ripoti a le Matagaluega o Aoga, Taaloga ma Aganuu mo lea vaega, ma ua tauaao atu foi i le Malo auā fuafuaga mo le faasoaina mai o seleni e faatino ai lea tulaga.
Saunoa le Pule Sili o le Matagaluega o Aoga, o le vaegatupe o le a faamatuu mai mo le faaleleia o ia tulaga uma, o le a agai sa‘o i le toe fausia o faleaoga sa faaleagaina aemaise o meatotino a aoga taitasi ua aofia uma i le ripoti ua i luma o le Malo i le taimi nei. “E lē o mautu mai se taimi e amata ai ia galuega faaleleia mo faleaoga ona o loo tālia le seleni mai le Malo e faatino ai,” o se saunoaga lea a Matafeo. Na ia ta‘ua foi, o se fesoasoani tau seleni mai le Malo o Ausetalia mo le faaleleia o aafiaga o le afā, o loo agai sa‘o i le Malo e faasoa mai ai e tusa o ana polokalame faataatitia.
O le vaiaso nei, lea ua toe amata ai aoga a le fanau ma e talitonu le Matagaluega o Aoga o vaega ua aafia i le afā, o le a lē avea lea ma itu e taofia ai le toe a‘e o aoga.
O le tele o aoga ua faaleagaina ua agai fanau i maota ma laoa o aiga i totonu o afioaga ma itumalo ina ia faagasolo ai pea a latou aoga o lenei tausaga ma ia aua ne‘i faalavelave ai fua i taumafaiga faalemafaufau a le fanau.
O le aoga tulagalua a Vaivase o le vasega muamua i le vasega lima ua faapea ona faasoa fanau i potu aoga ia o loo lelei pea i le taimi lenei ae o le aoga nofotumau a le Kolisi o Samoa ia ua faaaogā o latou fale mo Vasega Ono e oo i le Vasega Valu a le aoga o Vaivase.
