Faatali faatinoga o pili aoga e totogi e Niu Sila

O le aso ananafi na toe amata ai aoaoga a le fanau i Samoa i le mae‘a ai o tuuaga o le ogatotonu o le tausaga.
O le kuata lona tolu lenei o le tausaga ua amata ma o le taimi lenei lea na folafola ma pasia ai le faatino loa o le fesoasoani lea ua maau i ai le Malo o Niu Sila ina ia totogi ai pili aoga a fanau ua i vasega amata o Kolisi Maualuluga.
E amata lea fesoasoani i le Vasega 9 i le Vasega 11 ma o latou pili aoga ia o le a totogi i lalo o lenei fesoasoani. O le tausaga na tea nei na faalauiloa mai ai le fesoasoani lea a le Malo o Niu Sila.
O lona uiga ua na o le vasega 12 lea e sue ai le Tusipasi o Aoga (School Certificate), ma le Vasega 13 le vasega faaiu o Kolisi o le a totogi lava e mātua pili aoga a le fanau.
Sa faalauiloa i le amataga o le tausaga e le Ofisa Sili o Aoga, le Afioga Matafeo Tanielu Aiafi o le faaiuga o le tausaga amata atu ia Iulai e faatino ai lea faamoemoe ma na fesiligia le vaega o tupe a le Matagaluega o Aoga pe o le a faagasolo loa lea fesoasoani i lenei vaiaso, ae o le tala o lea ua pasia i le tulafono le faatinoga o lea faamoemoe ma ua iai foi ma le faamatalaga e toe faafoi uma lava le tupe lea na faaaogā e totogi ai pili o tama ma teine aoga o loo i nei vasega i aoga maualuluga pe a amata ona totogi e Niu Sila pili aoga i le masina lenei.
O lea faatoa mae‘a ona pasia le tala autū faatatau o le tupe a Samoa i le Palemene ma o lea la ua amata ona faasoa ane le tupe ua pasia i matagaluega taitasi. O iina lea ua agai i ai le fesoasoani lenei a Niu Sila, ma o le a faapea ona amata totogi pili aoga nei i le taimi e faamatuu mai ai e le Ofisa o Tupe seleni nei mo matagaluega eseese.
O le vaiaso la lenei ua faamoemoe e tatau ona maua ai lenei seleni auā o lea ua a‘e le kuata lona tolu o aoga.
Ua lua nei tausaga talu le fesoasoani muamua lea ua aooga fua uma ai fanau i aoga a le Malo ma aoga a Ekalesia Lotu lea e totogi foi e le Malo o Niu Sila ma le Malo o Ausetalia atoa ai le fesoasoani a le Malo o Samoa nei.