O loo taofia nei i le vaaiga a leoleo le alii loia o Semi Samau e faatali ai le Aso Tofi o le vaiaso nei e toe tulai ai i le Faamasinoga Maualuga mo le tuuina atu o ni folasaga a loia a le itu a leoleo ma loia mo lē ua molia, e fua i ai se faasalaga a le faamasinoga i moliaga e fitu ua faamaonia faasaga i lea loia o le atunuu.
E 3 moliaga o le gaoi a o avea ma tagata faigaluega, ma moliaga e 4 o le faia o ni faamaumauga sese ma le taulimaina o ni tupe i se auala solitulafono ua faamaonia faasaga ia te ia, ina ua mae‘a ona suesueina molimau a leoleo ma le molimau tetee a Semi Samau.
O ni mataupu tau i le faatauina o fanua sa avea ma aseta e faamauina ai nonogatupe a nisi i le Faletupe o Atina‘e o Samoa sa galue ai lē ua molia o se tasi e faauluulu i le vaega o galuega tau tulafono poo le legal divisions na mafua ai ona molia o ia ina ua mae‘a ni suesuega a leoleo.
E tusa ma le $140,000 se vaegatupe atoa a le faletupe na aafia i tuua‘iga faasaga i le alii loia.
Na faamaonia e le faamasinoga o le faatauina o se fanua i Vaivase, Saleimoa, ma Vaiaata i Savaii faapea se fanua i Pesega na faatino ai e lē ua molia ni feuiuiaiga ma i latou na faatauina, faapea foi i latou e ana ia aseta tau fanua na ia faaaogā ai nisi o vaegatupe ma ia faatauga fanua a le faletupe.
Na faamaonia foi e le faamasinoga, o lē ua molia na ia tatalaina se teugatupe i le Faletupe o Atina‘e, ae alu i le suafa o se tina faipisinisi (taofia le suafa) ma teu i ai ni seleni e au lona maualuga i le $40,000 ma na ia toe faaaogāina mo ia lava.
O nisi foi o faamaumauga sa fesiligia ai e le pulega o le faletupe poo fea na totogi i ai nisi o seleni o le faatauina o nisi o fanua, sa ioe le faamasinoga na faaauala ai ni gaioiga solitulafono.
O nisi o ia seleni na toe totogi e lē ua molia ma sa ia tusi atu foi i le Pule Sili o le Faletupe ma faailoa i ai o se sasi i ona tiute ua faaletonu ai ia vaegatupe tetele e au lava i le ta‘i $20,000.
Peitai sa teena e Semi o se sasi ua ia faia ai se soligatulafono mamafa. Sa ia tuuaia nisi o lana vaega ma le aufaigaluega a le faletupe i lo latou faatamala, ua lē maua ai nisi o faila o nonogatupe na aafia i le gaioiga.
O le susuga Semi Samau o se loia na faaalia i taualumaga a le faamasinoga sa faauu mai le Iunivesite o Aukilani, ae na malaga mai i Samoa ina ua faailoa i ai e se tasi o lona aiga o loo iai se galuega o loo sailia ai se loia mo le Faletupe o Atina‘e.
Le mafuaaga lea na malaga mai ai ma lona aiga i Samoa i se vaitau o le 1997 ma amata galue ai loa ma nofo i le atunuu seia oo ina alia‘e mai ni faaletonu ua faamaonia ai ona moliaga.
Sa ia tuua le Faletupe o Atina‘e ae faaauau lana galuega i le faletupe o le National Bank of Samoa, ma sa ia pulea foi le vaega o mataupu tau tulafono.
O se galuega na ia tuua ina ua galue i se ofisa loia tutoatasi i Apia seia oo ina valaauina ona moliaga i le faamasinoga.
