E faatoa feiloai le tele o aiga ma le mamalu eseese o Samoa i faalavelave fai. O le lua vaiaso talu ai na malaga mai ai se tasi o poutu toa o faasalalauga tau leitio a le 2AP le fetalaiga ia Vaasiliega Iupati Lagaaia, mo se faalavelave a si o latou aiga alii i le aai o Melepone.
Na avea lea avanoa ina ua mae‘a tiutefai, na maua ai se feiloaiga ma valaau faaaloalo ai e nisi o tamalii o le atunuu o tautuaina Samoa i luga o auaunaga tau leitio i le aai tele. Na lē gata la o le faataunuu o faatalatalanoaga ma vaili ai le utaga poto ma le tofa loloto a le tofa a Vaasiliega, ae na maua foi se laolao na faataunuu ai le faaafe a nisi o faafeagaiga ma le aufaasalalau.
E fā auaunaga tau leitio i Melepone o loo fai fesootaiga ma le 2AP i vaiaso taitasi, ma o le tele lava o nei faigapaaaga i luga o galugalu o le ea, o le fetalaiga lava a Vaa e pei ona silafia ai e le toatele o le atunuu e faatautaia. O le pogai foi lea o le a‘e o le tofa faaeaea a le aufaasalalau, ina ia maua se feiloaiga ma momoli ai le agaga o le faafetai ona o fesootaiga ma le tautua faifaipea a lenei tamalii iloga i faasalalauga.
E pei ona lausifia e le atunuu, ua loa tausaga o tautua ma auauna Vaasiliega i le 2AP i lona tolotolo i Mulinuu, lea ua iu ina faapaleina ai i le avea ma pule o le ofisa faasalalau. E
ui lava ona o faalavelave tau aiga na Malaga mai ai le susuga i le alii pule, ae faafetai i le Atua ona o se avanoa faaauro ua ia saunia e feiloai ai i le aufaasalalau, ma faafofoga foi Samoa o i Melepone, i le loloto o le tomai ua faa‘oaina ai le soifua o Vaa, auā le logologo puialiiina o le atunuu e ala i ona
faiva alofilima.
