Faatalanoa avanoa Pule Sili mo matagaluega 10 a le Malo

O loo faagasolo nei le faatalanoaina poo interviews mo avanoa o Pule Sili poo CEO o Matagaluega e sefulu a le Malo, mo le toe sailia o nisi faauluuluga fou pe a maea konekarate tai 3 tausaga a Pule Sili o iai nei i le faaiuga o le masina fou o Setema.
O nisi o Matagaluega o loo toe sailia ni faauluuluga e aofia ai le Matagaluega a le Palemia ma Kapeneta, Matagaluega o le Va i Fafo ma Fefaatauaiga, le Matagaluega o Punaoa Faalenatura ma Siosiomaga, Matagaluega o Fesootaiga Fatekonolosi, faapea le Matagaluega o Tina ma Tamaitai, Lotoifale, Pulenuu ma Agafesootai.
O se komiti filifilia a le Malo o loo feagai ma le faatalanoaina o ia avanoa ma ua faaalia mai e se tamaitai ofisa sinia o le Komisi e Pulea tagata faigaluega a le Malo e tatau ona faailoa lautele i latou ua filifilia i le masina fou.
O le Matagaluega o leoleo ma falepuipui na tapunia i le aso ananafi le avanoa o tusi talosaga mo nisi e fia maua lea tulaga tofi o le Komesina o leoleo ma falepuipui.
E lei manuia sailiga i le komisi e pulea tagata faigaluega a le Malo le PSC pe fia ni tusi talosaga ua oo atu, peitai o le masina fou foi e tatau ona maua ai se faaiuga ma iloa ai se tasi o le a avea ma Komesina fou o lea matagaluega taua a le Malo.
O le taimi nei o loo avea ma faauluuluga poo le Pule Sili o lea foi matagaluega a le Malo, le Susuga Papaliitele Lorenese Neru.