Faatalaleleiga a autalavou SISDAC Kuiniselani

E iai taimi e faatalale ai ma lē manatunatu le tagata soifua i faailoga o le taimi ua iai nei, pe a oo ina solosolo lelei taualumaga o le olaga, se‘i vaganā ua poia faamanu i ofaga ona tau tata loa lea i le moa o le ala ae ua fai sina tuai.

Na matuai iloga ona uluulu a matafolau i loto ma finagalo o le au faafofoga le feau o le lapataiga na momoli e tupulaga talavou o le SISDAC, a o faagasolo le masina faapitoa mo talavou a le Matagaluega Aso Fitu Samoa Tutoatasi Kuiniselani.

O loo vaevaeina le fale 7 i vaega e tolu. O Ekalesia o loo tausia e le taitai ia Pr Lagolago & Puataunofo Levae, faapea Luao & Imo Matai‘a na faisao i se polokalame uigaese i le po o le Aso Faraile aso 14 o Setema.

O le autū e faapea “UA E SAUNI?” (Are you ready?) Na vaaia le laufofoga maligi a o faasauaina ma faatagataotauaina i latou o ē mau ia Iesu, o se faatusa o aso faigata pe a oo mai sauaga ua valoia e le Tusi Paia.

O se fafagu ina ia mataala tagata uma ina ne‘i oo mai ia aso, a o lava taoso le faigamalaga. Toe lua vaiaso o lea faatalaleleiga ma o loo molimauina le faatumulia i tupulaga ma soo se tasi. O le tala moni, “E tupu le faatuatua i le tau logologo atu, O le tau logologo atu foi, o i le Afioga a le Atua lea.

O le ofisa o le autalavou o le Region a Reupena, na uluai tatala le polokalame: Taitai autalavou Dara-Sosina Faanana; Taitai autalavou Algester-Tamalelagi Tupai Mata Tufuga; Taitai Southside – Rosseane Afoa Sui – Le’au Kolose Leau; Faipese – Rita Muliaga.

Manuia le faasauni atu o nisi Regions o loo totoe ia latou sauniuniga.