Faatagisia le fesoasoani a le Aiga-i-le-tai, Satuimalufilufi, Samatau ma Falelatai mo le Kolisi a Aana #2

O le Aso Toonai nei, 13 o Aperila i le 10 i le taeao i le Ekalesia PIC i Magele i Aukilani o le a faia ai le po siva auā se fesoasoani mo le ‘hall’ a le Kolisi Aana # 2 o loo utuvai i ai alo ma fanau a le itumalo o le Aiga-i-le-tai, faapea Satuimalufilufi, aemaise le itumalo o Samatau ma Falelatai.
O se faamoemoe ua faapea ona tuutuu laau mamao mai ai sui o le komiti o le aoga mai Samoa i le Peresetene, le Afioga Mauinatu Kofe Mafua o Mulifanua, le failautusi le afioga Nanai Lalu o Matautu Falelatai, le teutupe i le tofa Sau Lapi o Apolima, le tamā o le itumalo i le Aiga-i-le-tai i le afioga i le faipule ia Ifopo Felisi faapea le susuga i le alii puleaoga, le tofa Masuisui Vave, o sui o faiaoga ma sui o le asosi a mātua.
O le sui Peresetene o le afioga ia Taefu Lemi, le faipule o Samatau ma Falelatai, peitai e lē o auai i le aumalaga ona o nisi o tuatuanoa i Samoa. Faaalia e le taitaimalaga, le fetalaiga Lavea Talaia Fonoti o le sui foi lea o Samatau, “E sefulu faleaoga tulagalua e faasolo mai i Mulifanua, o Satuimalufilufi, o Apolima, o Manono-Tai i le faleaoga i Salua ma le faleaoga i Faleu, o Manono-Uta, o Samatau, o Siufaga, o Pata ma le faleaoga tulagalua i Matautu Falelatai e faauma aoaoga maualuluga i le Kolisi o Aana # 2. O loo faapea foi ona faauma mai i ai le vasega 13 a alo ma fanau o loo aoga i le Kolisi o Aana # 1.”
Fetalai Lavea, “O le manuia o aiga ma afioaga i Samoa i le taimi nei ua faamoemoe i le lelei o aoga a fanau. Ua uma aso ia sa faamoemoe ai i faletautu auā gafa maualuluga o Samoa, poo taua sa saili ai malo. O aso nei, a poto le tama poo le teine, o le faaeaina lena o ona mātua ma lona aiga.”
O se tasi o faatofala‘iga a le Malo mo le manuia o tagata uma, o le atina‘eina lea o aoga maualuluga i itumalo taitasi. O se tulaga ua suia ai le itu faigata sa tau saili ai aiga i Apia e nofo aoga ai nai fanau mai nuu i tua faapea Savaii ona o le fia maua o aoaoga lelei i le taulaga.
O le Aso Toonai na mavae atu nei na feiloai ai le mafutaga a le afioaga o Samatau i Aukilani e tusa ma le faatalauula mai a le malaga mai Samoa. Fetalai le tofa Pa‘u Fereti Puni o se tasi o tootoo o le nuu, “Talia lelei e Samatau i Aukilani le faamoemoe.
E auau a maa o le matitiva. Ae o le upu a le atunuu, e au uma i le tauola, e au foi i le fagota. O le mea  moni, e leai lava se tagata o nei afioaga e sefulu e leai sona toto poo sona aano e lē utuvai i le Kolisi a le itumalo.”
Ua tolu vaiaso talu ona i Aukilani nisi o sui o le Komiti mai Samoa mo le faalauiloaina o le sailiga seleni aemaise o le tuufaatasia o le komiti mo tapenaga o le faamoemoe. Faaalia e Lavea, “O loo tofu lava le afioaga i Samoa ma le sui i le Komiti o le Aoga.
Ma o loo taoto foi i afioaga taitasi le filifilia mai o o latou sui mo le Komiti o le tapenaga i Aukilani nei, lea ua avea ai le tofa Loloufono Alapati To‘o o se tasi o sui o Samatau i Aukilani ma taitai Komiti.”
Faaalia e le tofa Loloufono le agaga faafetai i le faafeagaiga a le ekaleisa PIC i Magele, le susuga ia Rev. Sola Maua & Pouvai a o se lupe faalele a le afioaga o Mulifanua, i le faaavanoaina o le nofoaga o le ekalesia mo le faamoemoe o itumalo e lua faapea  Satuimalufilufi.
Fetalai Loloufono, “E lē o toe faigofie mea tau tupe i Niu Sila. Peitai, o le Isaraelu moni lava ia e susue lava le faamalama ma vaavaai i lona nuu ma lona itumalo na fanau ai.”