Numera tasi le tofa Tuilo‘a Anetele‘a e avea ma o latou tofi faipule i faalagamaea o upufai o le Malo o Samoa. Talu ona ulufale lea tamalii matua o le atunuu i le maota fono, o lana matatioata pogisa na te faaaogā, e lē gata i tauaofiaga a le Palemene, ae faapea foi i fafo mai o le maota fono i taimi o ona tiute faafaipule atoa ai ma lona nuu, le itumalo ma le aiga.
Faato‘ā faalogoina i le Palemene i lana fonotaga i le Aso Lua 17 o Ianuari se faauilavea mai se tasi o faipule sinia o le maota sa avea ma fofoga fetalai ma Minisita o le kapeneta le afioga Toleafoa Faafisi, na fesiligia ai le fofoga o le fono i tulafono tumau ma le faaaogā pea e le faipule o Gagaifomauga numera tasi o le matatioata pogisa.
E lē faatagaina i tulafono tumau ni matatioata lanu poo le sunglass seia vaganā le mata vaaiga mamao ma le mata faitautusi.
“E mafua ona ou tulai atu lau afioga i le Fofoga Fetalai ona ua matauina pea le sui mamalu e faaaogā lana matatioata pogisa i totonu o le maota ae o le popolega e iai mata faapea e ati lona malosi, ma e popole ai i le mamalu o sui o lenei maota fono”.
O le faauilavea lea a Toleafoa Faafisi a o saunoa Tuilo‘a i le Tala faaopoopo o le tupe. Na faaalia e le Fofoga Fetalai le susuga Laauli Leuatea Polataivao, o le paeaiga a le palemene ua mavae a o avea le tofa Tolofuaivalelei Falemoe Leiataua ma fofoga o le fono, na faataga ai i sana faaiuga le faaaogāina e Tuilo‘a o lana mata pogisa i le Palemene, ona o ona fofoga (mata) sa faia se taotoga i fafo.
Na tulai ane le sui faipule o Gagaifomauga numera tasi, ma ia faaalia ua toeitiiti lava fesili se isi pe iai sona ofuvae laitiiti.
Na taliē le maota fono i lea lafoga a le sui faipule matua, peitai na avea ia lafoga atoa ai ma se saunoaga a le sui na ia ta‘ua ai o Safotu o le uluai Tumua ae o isi uma Tootoo o Salafai o Tumuli, na faatū ai se lafo e le Minisita o Tupe, le afioga Faumuina Tiatia Liuga, ina ia aveese ia lafoga ma faamaumauga a le Palemene.
Na faalua le lafo ma tuu atu le fesili ma ioeina ai le aveesea o ia vaega o le saunoaga a le faipule o Gagaifomauga Numera tasi.
E manatu le sui faipule matua e pei ona ia toe faaalia i le palemene, o upu tuusa‘o e malamalama ai se lagona o fia faaleo i se mataupu taua.
O le tasi lea o faipule e malie tele ana saunoaga i le maota fono, pe a tauaofia le fono usu a Samoa. Peitai o le taimi muamua lea ua faatū ai e le itu a le Malo o loo avea ai Tuilo‘a ma sui lagolago o le HRPP, se lafo e aveesea ai ni vaega o ana saunoaga i le Palemene.
