“Ua taumafai le Pule Sili e natia faaletonu tau tupe”
Ua faia le faaiuga a le Pule Sili o le Matagaluega o le Soifua Maloloina, le faletua o Palanitina Tupuimatagi Toelupe, e faataape le Komiti Faafoe ua maea ona filifilia a le sosaiete o le mai suka, sei toe valaau se isi fonotaga faapitoa e toe filifili ai se Komiti Faafoe.
Ua faatonuina foi e le Pule Sili le tapuni o le falemai o le sosaiete o loo i tua ane o le Maota o Pulenuu i le Eleele Fou, ma ia toe foi atu le fomai o loo totogi e le Matagaluega o le Soifua Maloloina.
O le faaiuga lea i le maea o se fonotaga a le Pule Sili ma sui o le Komiti Faafoe na filifilia i le masina o Iuni, peitai na vevesi ai le sosaiete mai lea taimi e oo mai i le taimi nei, ina ua sue atu tupe ma isi meatotino e le o lelei ona pulea e sui o le Komiti Faafoe sa iai, ma ua tuuaia ai lava le Sui Peresitene ma le Failautusi o sui o le sosaiete a alii ma tamaitai tausi soifua (Samoa Nurses Association).
Teena le faaiuga e le komiti
E le o talia e le komiti fou le faaiuga ua faia e le Pule Sili o le Soifua Maloloina, i le saunoaga a le Teutupe le faletua o Theresa Ah Yen Duffy o se taumafaiga ua atagia ai ua faaletagata (personal) le tulaga ua oo i ai le vevesi, ma o se gaioiga foi ua taumafai ai e natia faaletonu tau tupe ma le faaaogaina o meatotino a le sosaiete o loo tuuaia ai le Sui Peresitene, le afioga Taulapapa Faamanatu Nielsen i lona faaaoga o se vaega o seleni i ona faalavelave ae ua le mafai ona toe totogi.
O le Komiti Faafoe na filifilia i le fono faaletausaga na usuia ia Iuni 2009, o loo tetee i ai le Sui Peresitene ma le Failautusi i le la mau e le o tusa ai ma aiaiga o le Faavae o le sosaiete lo latou filifilia.
Peitai na tutumau lava le Komiti Faafoe ma latou faia ai loa le faaiuga e ala i se palota o le le faatuatuaina e ave ese ma faamalolo tofi o le Sui Peresitene ma le Failautusi.
O le iuga lea o loo manatu le komiti fou ua mafua ai ona faataape loa e le Pule Sili le latou laulau faatasi ai ma le Sui Peresitene ma le Failautusi ae toe valaau se isi fono e toe filifili ai se laulau fou.
Sa fesootai le tusitala ma le Sui Peresitene i se tasi o vaega o lenei feteenaiga ae sa ia faailoa mai, e le toe fia faaalia sona manatu i le mataupu sei tau maua se filemu.
E lei mafai ona saofia sailiga mo se finagalo o le Pule Sili o le Matagaluega o le Soifua Maloloina ona sa pisi i ana fonotaga.
O loo faatalia nei se feiloaiga a le komiti fou ma le alii Palemia, Susuga Tuilaepa Lupesoliai Sailele Malielegaoi, lea o le a fofola i ai faaletonu ua tulai mai.
Na afea le vevesi o le sosaiete mai suka i le tali fuaitau a le Palemia i le Palemene i ni finagalo o nisi faipule sa laga ai faaletonu sa feuai ai alii ma tamaitai leoleo o le Malo o sui o le latou sosaiete, na fesiligia ai foi tupe a lea faalapotopotoga poo fea o iai. Faaalia e Tuilapea e mafua ona vevesi faalapotopotoga ona o le leai o ni fonotaga e faamafolafola lelei ai tulaga tau tupe ma isi galuega i le lotoifale o faalapotopotoga.
O le mafuaaga foi lea na faatu ai e le Malo se tulafono ua pasia e le Palemene e fofo ai vevesi i totonu o faalapotopotoga tau taaloga, lea na muamua fofo ai le vevesi a le asosi soka.
E iai le talitonuga o se tulaga faapea e ono oo iai vevesi tau tupe i totonu o faalapotopotoga tumaoti, pe afai e le mafai ona maua se fofo e pei o le sosaiete mai suka, ua siliga ona maua se togafiti o le gasegase ona ua ui, ua leva ona taoto ae lei faia i ai se galuega i tausaga ua mavae sa iite ai nisi o sui i faaletonu ua masua mai nei ma puai mai i fafo.