Faasolo pepē manu‘a o le tamaitai Tonga

Ua faasolosolo manuia le tamaitai Tonga lea na osofai e se alii sa la mafuta ma nonofo o se ulugalii e pei ona tea i tua ma le falemai ma o loo iai nei o ia i le vaaiga a le faalapotopotoga o le Toomaga mo ē Puapuagatia i le nofoaga i Tuanaimato o loo avea ma maluapapa o fanau ma i latou ua sauaina.
Ua faailoa mai e le Toomaga i se pepa o faamatalaga, o manu‘a i ona foliga, ma vaega eseese o lona tino e ui e faapea ua faasolo pepē, ae o le a tumau pea ona mailaila ma o se faailoga o le a lē tea ese ma le mafaufau o lea tina talavou, e manatua ai pea le tuanai o le Aso Sa o Tina o lenei tausaga na osofaia ai e lona toalua.
E toatele le atunuu ma se vaega o tagatānuu o Tonga o loo aumau i Samoa na agalelei atu i lea tina ma o le faafetai lea a le peresetene o le Toomaga. O le amataga o le vaiaso na tea nei na tulai ai le alii o loo molia i lea gaioiga solitulafono na ia faia, ma o loo faagasolo pea valaauga o lona faamasinoga ona e lei mae‘a suesuega a leoleo.
Maota Gasegase Tupua Tamasese Meaole i Upolu