O le Aso Toonai, 12 o Ianuari na i‘u faafuasei ai le soifua o le afioga i le Tiakono i lona maota i Elsdon i Porirua. O se itu e faanoanoa ai ona na i‘u le soifua o lenei tamā amio tausaafia, o loo toesea le faletua i Samoa ona o fuafuaga faaleaiga.
O le afioga i le Tiakono o se tasi e tautua matavela i lona aiga aemaise o lana ekalesia. O lona afioaga o Palauli ma Avao o le afioaga lea o lona tamā, ae o Vaovai i Falealili le afioaga o lona tina.
O tuaa o Iefata Ioane na galulue faafaifeau i le Ekalesia EFKS i le nuu o Vaipu‘a i Savaii i ni tausaga e tele ua mavae. O iina foi lea e iai le talitonuga i uiga tautua lelei ma le loto maulalo o le susuga ia Iefata i ona tofi i le ekalesia, ona sa lelei ona tapu‘e mai e ona mātua na tautua i le finagalo o le Atua.
Na galue faaofisa Iefata Ioane i le Ofisa o Vaaifetu i Mulinuu i Apia ma ina ua taunuu mai i Niu Sila ona avea lea ma avepasi mo tausaga e 25 seia oo ina valaauina e lona Matai.
O si ona faletua ia Feagiai Ioane e mai afioaga o Palauli ma Fasitoo. O ia foi ua faauuina e fai ma A‘oa‘o Fesoasoani mo le Ekalesia PIPC i Porirua, ma o se tasi o faiaoga o le Pacific Bible College i le laumua. E toatolu nai o la alo ma fanau a fanau e toalua.
Manaia tele molimau na faasoa mai e le aiga faanoanoa i uiga o lenei tiakono, e tusa o lana taitaiga o lana fanau ma lona aiga i ona uso ma tuafāfine. Sa faapea foi ona matagofie ona molimau mai lana faifeau Rev Perema Leasi ma le Fofoga o le Ekalesia, Lio Paese e tusa o lona tautua faamaoni i totonu o le ekalesia.
Na mae‘a lona falelauasiga i Whenua Tapu ona tuumuli lea o le aofia i le PIC House na faamae‘a ai polokalame o le tuumalo o le tiakono.
O le fetalaiga ia Vae‘auga na fetalai mo aiga na lua e momoli faaaloaloga matagofie ma le maualuga i le Taitai o le sauniga faapea le Aufaigaluega a le Atua aemaise le ekalesia.
Avea foi lenei avanoa e toe faamaise atu ai i le tina faanoanoa, Feagiai ma le nofoaalo faapea aiga na lua. Ia saga faalototeleina pea outou e le mana faamafanafana o le Atua.
