O le ausiva logologoa i Niu Sila a le ‘Tatau Samoa’ na malaga mai i Sini Ausetalia nei mo ni faafiafiaga e aofia ai se asiasiga tāua i aoga o loo iai alo ma fanau Samoa.
O le susuga a Alapati Tupuola mai Vaivase-tai, Falefa ma Tanugamanono e faauluulu i ai lenei ausiva talavou. Na faafiafia i latou i le kalapu o le One World i Parramatta i le aso ono o Aperila a o iai i Sini nei.
O le vaiaso talu ai na asiasi atu ai i MacQuarie Fields i le aoga maualuga James Meehan e tatala atu la latou taleni mo fanau Samoa ma le Pasefika. Saunoa le alii faiaoga ia Sevaomeafou Atonio ma le tamaitai ia Lisa Veilo o se aso matagofie.
O le ‘Tatau Samoa’ e toalima ona sui ma e tofu uma ma malofie poo le pe‘a. I lea asiasiga i le aoga maualuga na faasoa ai le ausiva i le tāua o le Siva Samoa e tauave ai lo latou tu ma agaifanua aemise lo latou faasinomaga e ui ua aumau nei i Niu Sila.
Na fesili le fanau i le itu tau i le malofie auā e sogaimiti uma le ausiva. Na toe faamanino ai e le susuga a Alapati le tāua o le tatau (pe‘a) mai aso anamua auā o se laei e momoo i ai tamalii ma tulatoa. “O le mau a Samoa e masani ai i lenei measina afai ua manao i le pe‘a, ia talia tiga.” O se luitau aogā tele auā a faatusa i le olaga faifaipea o Samoa mai anamua, a ua fia avea ma faifaatoaga ia tautuana ia galue malosi ma aua le faavaivai. Afai ua filifili e taalo lakapi matuā taalo ma koleni lelei ia manaia lau taleni. A faapea foi ua maua le avanoa e saili i le poto lautele ia matuā toaga e fai meaaoga ma aua le faalogologo tiga.
“O upu a le atunuu a manao i le pe‘a e tatau ona ta muamua le gutu (tulou) faato‘ā taoto ai lea mo se malofie,” o le toe faamanatu lea a Alapati. Na faia foi e le ‘Tatau Samoa’ aoga siva ma faataitaiga mo le fanau na lolofi atu e fia malamalama atili. Sa taalo foi Alapati i le aufili a Samoa i lalo o le 19 tausaga.
O tuaa o Alapati ua iloga o latou sao mo Samoa i le lakapi lea na avea ai lona tamā ma sui o le Manu Samoa mai le 1981-1990. Sa taalo foi lona tina ia Wendy Faapoi i le aufili volipolo a tamaitai Samoa mo ni tausaga se tele. Ae peitai o le tina o lona tina ia Marina Schaafhausen e manatua pea i lana tautua maoae i le lakapi a Samoa.
E lē taumate o le taleni faasoa lea a le Tatau Samoa o le a teuloto i fanau a Sini sa faasoa atu i ai.
