Ua fai le pule a le Malo i taavale ave ma‘i poo ambulance e 4 o le meaalofa mai le Malo o Iapani, lea ua ave ai le isi lua mo le tautuaina o le mamalu o le atunuu i Savaii. “Ua leva tele o talosaga mai faipule o le motu tele i Salafai i ni taavale ave ma‘i, ae o lea ua tali lo latou manao e ala i le meaalofa a Iapani”.
O le finagalo lea o le tamaitai Minisita o le Matagaluega o le Soifua Maloloina, Gatoloaifa‘ana Amataga Alesana Gidlow, ina ua fesili tuusa‘o i ai le tusitala i le faasoaina o taavale ave ma‘i.
O tauaofiaga a le Palemene ua tuanai atu sa laga ai pea e sui faipule mai Savaii manaoga moni taavale ave ma‘i. Sa mafua ona finauina lea tulaga ona o faaletonu i le feaveaiina o gasegase mai falemai faaitumalo i vaega eseese o Savaii, e lē lava taavale faapea a le Matagaluega o le Soifua Maloloina.
E mafua foi ona manaomia ia taavale ona ua iai totoga uma e faaaogā mo se gasegase. O lea la ua olioli ma pepese fiafia faipule mai Puleono ua iai taavale se lua e faaopoopo i taavale o loo faaaogā mo lea auaunaga.
Ua leva tausaga o faauouo pea e Samoa Iapani ma osiosi feagaiga lelei ma lea Malo agalelei, ma o se faigauo mafanafana o loo auala mai ai foi le tele o fesoasoani mo Samoa.
O le meaalofa a lea Malo o taavale fuimu e 4 ma taavale ave ma‘i e 4, o se foai tāua tele auā e lē gafatia e tupe o le tamaoaiga o Samoa ona faatupe ni taavale tāua faapea.
O le agaga lea o le alii Palemia na ia molimoli ai le faafetai ma le faamālō i lea Malo agaalofa ua lasi lona alofa tulai mo le faaleleia o le soifuaga o tagata Samoa aemaise ana fesoasoai i le itu i aoaoga, faatoaga, soifua maloloina ma isi lava atinae tetele e pei o taligalu o loo i faataamilo i le talafatai o le taulaga o Apia.
O le tamaitai sui Minisita o le va i fafo o lea Malo o Chinami Nishimura na fai ma sui o lona Malo faapea le alii Amapasa o Iapani mo Samoa o Toshihiro Takahashi na la tauaaoina atu i le Malo o Samoa ia taavale ma le agaga o le fiafia tele, ua maua se isi avanoa e asiasi mai ai se sui minisita o lea Malo e feiloai ma taitai o le Malo o Samoa e aofia ai le Palemia ma le Ao Mamalu o le Malo.
O le agaga o le fiafia tele o le Malo o Samoa na alo ai e faatino faaaloaloga mo le faigamalaga a le tamaitai sui Minisita ma le Amepasa o lea Malo e pei ona tatala Ie o au‘afa ma Ie o moegalafo i faaaloaloga masani faaleaganuu mo ia Malo faaaloalogia.
