Ua mae‘a atu galuega o le vaiaso e pei ona molimauina i le faaiuga ua faalauiloa e faatatau ia Ben Lei‘a, le tama talavou lea na faato‘ā lua lava vaiaso o taalo ia Malisi ae tulai mai ai loa ma le faalavelave i le taimi o toleniga ua pipili ai nei.
O le vaiaso na tea nei lea na faalauiloa ai e le tina o Ben Lei‘a lona faanoanoa tele ona o lona manatu o le tupe lea na saili e Richie McCaw ma isi alo o Samoa ua lauiloa i taaloga o le lakapi ma le netipolo, e tatau ona tuu uma atu ia te ia poo lona aiga foi.
“Ua uma ona iloa o le tausiga o Ben i le falemai e matuā lē faigofie ona e pei lava ona silafia e le atunuu e tupe lava mea uma,” o se faaseā lea a le tina i luga o televise, leitio faapea nusipepa.
“Ae na o le $100 tala lava lea e avatu i le Malisi auā le tausiga o Ben i vaiaso taitasi ma e lē gafatia ai le tausiga o si a‘u tama. O le tupe lea na saili i Niu Sila sa faia i lalo o le igoa o la‘u tama, ma o le mafuaaga lea o lo‘u manatu e tatau lava ona sau sa‘o lea tupe mo le tausiga o ia aemaise o le tele o mea o loo moomia”. Na iu lava ina oo le tina lenei i le Alii Palemia ma faatonuina ai loa e le Palemia le Kalapu Lakapi a Malisi e avane le tupe lea na sailia i Niu Sila i le tina o lea alii ua manu‘a ona o le tupe lea na aoina i le sailigatupe tele lenei na aoina mo le alii lea.
O le vaiaso la na tea nei na tali mai ai loa le Kalapu a Malisi i lenei mataupu.
Faaalia e Tagaloa Fouina Su‘a le Peresitene o le Malisi, o le taimi lenei o le teugatupe sa faia ina ia saili fesoasoani ai mo togafitiga ma le tausiga o Ben Lei‘a e pei ona faamalaga‘i e le Malisi ma fesootai atu ai i tagata taaalo lauiloa o Samoa i Niu Sila aemaise tama lakapi o le All Blacks na pulupululima uma i lenei faamoemoe, o loo i lalo o se teugatupe o loo vaaia lava e i latou i Niu Sila na faatautaia le sailigatupe lenei.
O le fesootaiga a lea vaega o Samaria agalelei, o le Kalapu a le Malisi i Samoa nei ma e talu ona mae‘a lea sailigatupe, e lei sau lava se tupe i Samoa nei i le latou kalapu talu ai o loo faamautu lelei le agai mai ai o lenei fesoasoani.
O le faamalamalamaga o lenei fesoasoani e faapea, ua mae‘a se asiasiga a ni alii papalagi o loo i totonu o le Komiti ua tofia e vaaia lenei teugatupe, ma o i laua ia na agai mai i Samoa ma feutagai ma le aiga ma ua mae‘a ona iai se maliega o le a fau se fale mo Ben Lei‘a i lona nuu o Satitoa i Aleipata.
O se fale o le a fausia ma manaoga faapitoa e faafaigofie ai ona fealuai lenei alii e ui o lea ua pipili. Ua iai foi ma se maliega e faatau se taavale faapitoa e mafai lava ona faatautaia e lenei alii auā le mafai ai ona fealuai i soo se itu o Samoa e aunoa ma le tau toe faalagolago i se isi tagata ma e taugata lea ituaiga taavale.
O le vaega e totoe o le Seleni o le a teuina ma faasoa mai ai manaoga o Ben Lei‘a e ala i le tausiga ma togafitiga o ia.
O le taimi lenei na ta‘ua e Tagaloa, o le $100 lea ua avatu i vaiaso taitasi i le tina, o le tupe lava lea a le Kalapu a Malisi latou ua faapea ona avatu e totogi ai le tina poo le uncle o Ben lea na vaaia ia mai i le taimi na taofia ai i le falemai.
O loo faatau foi lava e le Malisi taumafa ma isi vaega o le tausiga i aso fai pea o lea taulealea, lea e fai foi e le Kalapu a le Malisi ma avatu i le falemai.
O le lisi o manaoga o Ben o loo ave i le Malisi mai i le falemai i Motootua ma o iina lea e avatu i ai lea faatauga i vaiaso uma lava.
O le popolega tele o le Malisi na ta‘ua e Tagaloa, o le aumai o lenei tupe i le aiga ae mae‘a ane ua lē faataunuuina ai le fuafuaga na ala ai ona fai lenei sailiga tupe, ma o le faamoemoe o le tupe lenei, ua teuina i le suafa o Ben Lei‘a ua faapea ona iai ona o le manaoga ina ia umi se taimi e tausia ai lenei alii. Ua ta‘ua e le Alii Peresitene, e lē o iai lava se manatu e faaaogā i se auala sese le seleni ua aoina ona o Ben Lei‘a, ae o le faanoanoaga o le agai o le tina e faalauiloa solo lona lē malie, ae e leai ma se tupe ua oo mai ua na o le pau lea o le seleni o loo faaaogā, o le teugatupe a le Malisi lava ia i Samoa nei.
O loo tālia nei la se taimi e mafai ai ona amata le galuega o le fale o lea alii ma le taavale o loo saili ae o le taimi lenei o loo faapea ona taofia pea Ben Lei‘a i le falemai auā le faagasologa o ona togafitiga.
