Faatali se tali mai le Fono a le Au Toeaina
Ua oo se faitioga a ni sui o le aulotu a le Ekalesia Faapotopotoga Kerisiano Samoa a Moataa i le Fono a le Au Toeaina a le EFKS ona o ni lafoga na faapea ua faia e lo latou faafeagaiga ua le ogatusa ma le galuega na manatu le potopotoga e tatau ona lafo e se faifeau.
O se tasi o Aso Sa i se sauniga a o loma ai le Fono Tele na ta‘ua ai e sui o le aulotu na tulai ai le alii faifeau ma fai ane i le aulotu e le o toe fia faalogo i se tasi o viiga na saunia e le aufaipese, ma faaauau ai lana saunoaga, poo malamalama le aulotu “… e leai se lagi”.
O se folasaga na ta‘ua e nisi o le aulotu na matua faateia ai i latou. “O le taimi lenei o loo tau onosaia lava e toeaiina o le nuu lea lauga,” o se faamatalaga lea a se tasi o matai na fesiligia e le tatou ofisa.
“E foliga mai ua maualuga tele le atamai o le faafeagaiga i le Mataupu silisili, ai o le mafuaaga lea o le folasaga, ae e fesiligia lava la poo le a tonu lava le uiga o le galuega o fai nei e faifeau i afioaga o le atunuu,” na faaauau le faaali o le faanoanoa o lea matai.
“Afai e moni ana faamatalaga ia e sili ai le malolo uma loa aua nei toe alu se isi i le lotu aua o lea e solomua i ana auauna le tala‘i o nei ituaiga aoaoga”.
O le faanoanoa lea o sui o le aulotu na iu ai lava ia savalia faauluuluga o le Ekalesia ma fesiligia so latou finagalo.
E lei tali mai le Failautusi, Rev. Dr Iutisone Salevao i le mataupu aemaise o sona finagalo i lea lafoga ae na ia faaalia e faamaonia le oo atu o ni faaseā a nisi o le aulotu a Moataa e faatatau i le lafoga a le latou faifeau, ae na ia ta‘ua e leai lava se faaiuga e faia i se auauna a le Ekalesia faatatau lea i sana gaioiga ua faia ua feteenai ai ma sana aulotu sei vagana lava ua mae‘a suesue ma iloilo lelei, ma o le Fono la a le autoeaina o le a filifilia ai lea tulaga.
O loo faatali la lea iloiloga ma ua faatali foi ma le aulotu poo le a tonu lava se isi laasaga o le a latou faia e faatatau i lafoga nei.
Ua iai le manatu o nisi o le aulotu ua le o toe iai se manaoga e faaauau le mafutaga ma le faafeagaiga ae o lea faato‘ā taape atu le Fono Tele ma e lei feiloai lelei lava la le aulotu ma lo latou faafeagaiga e faatatau i lenei mataupu.
O le a tuliloaina foi le iuga e oo i ai lea feiloaiga i le va o itu e lua.
