Ua faaseā le Komesina o Sulufa‘iga poo le Ombudsman i le molimauina e lona ofisa o ni gaioiga lē manuia faaalatua, ua faia e nisi o sui o le faalapotopotoga o le Koluse Mumu.
O lenei mataupu e faasino atu i le faagaioia o le lesitalaina o sui auai o lea faalapotopotoga a o sauni atu i lana fono faaletausaga i le masina fou o le a filifilia ai ni taitai o le Koluse Mumu a Samoa.
O le Komesina o Sulufa‘iga ua tofia e le Faamasinoga e avea ma taitaifono i le faatinoina o le fono faaletausaga a lea faalapotopotoga, e mafua i ni feteenaiga na tulai mai i le va o le Peresitene sa iai ma nisi o sui auai.
Ua faaalia e le afioga Maiava Iulai Toma, le Komesina o Sulufa‘iga, e iai nisi ua latou ao mai tagata i nuu ma afioaga ma avatu lesitala.
Peitai ua iloa ane, o le toatele lava o ia tagata e leai se silafia i le Koluse Mumu pe iai foi ni mafuaaga tāua ua fia avea ai ma sui auai.
O le itu mautinoa ua mafua ona faia lea gaioiga, ina ia faamalie ai ni manaoga faivavale o nisi sui.
O nei taumafaiga uma le faamaoni ona o loo mananao ina ia manumalo le latou itu i le sailiga o tofi o le faalapotopotoga. Ua faaalia e le Komesina o Sulufa‘iga, e iai le malosiaga o le latou ofisa e teena ai le talia o ni lesitala o sui auai.
Ua faaalia e se molimau e faapea, e iai se sui matua o le faalapotopotoga ua alu lana savali i nisi o tagata o ona tauaiga ma faatonu e agai i Motootua i le ofisa o le Koluse Mumu e lesitala mo le fonotele i le masina fou.
Ua molimauina ai e le Komesina o Sulufa‘iga le alu atu o taavale tutumu i tagata eseese ma lesitala o latou suafa, ae totogi e nisi o sui auai o le faalapotopotoga o loo iai nei seleni mo ia lesitala.
O loo mataitu lenei gaioiga lē manuia ma o le a faia i ai se faaiuga i se taimi e lē o toe mamao.
