“O le a ave i ai le tusi e faatali se‘i maua le isi lomiga”..Minisita
O Faalupega o se nuu ma se afioaga i lo tatou atunuu, o le folasaga lea o matai tāua mai lava ia i latou o loo faasa‘osa‘o o tamalii ma failauga togia e faia upu o le nuu e oo lava i isi tulaga faalupe o se nuu.
E iai le talitonuga o paia ma mamalu faalupe o se afioaga i aso ma tausaga anamua sa lei faamaumauina auā sa tuu fofoga mai lea tupulaga i le isi augatupulaga ma faapena lava ona tauave ai. Peitai o le tusi faalupega muamua na tuufaatasia e le alii Siamani o Grammer, i le taimi o pulega a Siamani i Samoa na faatoa iloa ai ua faamaumauina faalupega o nuu ma afioaga ma faapea ona faamauina ai i se isi o vaitau ma lomia e le ekalesia EFKS le tusi faalupega muamua.
O le tusi lea o loo lima taitaiina ai le galuega a le Malo o nafa ma le Faleula o le fausia o se Tusi Faalupega e tuu i ai ma isi vaega tāua o a tatou tu ma aganuu i mamalu faalupeina e pei o igoa a ipu, o tulaga maota, sa‘o tamaitai, ma toga a tamalii ma le au tulatoa o le au faiupu o nuu ma afioaga.
O le lavelave o le galuega a le Faleula e tau faamaopoopo le Tusi Faalupega na iu lava ina taunuu i se taotoga na lolomi ai loa le uluai Tusi Faalupega a le Malo i le sefulu tausaga ua mavae. Peitai e iai nuu ma afioaga na faaseā matai ona sa lē sagatonu o latou faalupega.
O le tusi faalupega foi a le malo ua amata pae ai mamalu e amata mai i tamalii seia oo i failauga ma tuua o nuu. Ae sa lē maua ai lava se toafilemu o nisi nuu ma faapea ona toe tapena ai foi e le Faleula se isi lomiga e pei ona faasalalau ma faatau i tua i le vaiaso lona lua o Aokuso 2013 le lomiga lona lua o le Tusi Faalupega a le Malo. E ui ina faia nisi o suiga i faalupega o nisi nuu ae e iai lava nuu ma afioaga o loo faaseā. E pei o Alii ma Faipule o Afega.
E lei maua se isi o matai o le nuu mo se faamatalaga, ae ua na o se kopi o le latou tusi faaseā ua ave i le Minisita o Tina ma Tamaitai ma Pulenuu o loo faaalia ai vaega o loo faaseā ai. O loo ta‘ua ai foi i le tusi a alii ma faipule e faapea o le mae‘a o se latou feiloaiga ma le minisita le tofa Tolofuaivalelei Falemoe Leiaaua na saunoa ane ai le minisita o le a taofi le faatauina o le lomiga lua o le Tusi Faalupega a le Malo ona o mafuaaga ua faailoa atu e alii ma faipule o Afega.
Peitai sa teena e le Minisita le iai o sona finagalo faapea i le feiloaiga na faia i le aso 16 o Aukuso 2013. “O le a ave i ai le tusi e tusa ma le latou savali, ina ia faatali i le isi lomiga fou, ae e leai sa‘u faamatalaga faapena na faia”. O loo iai i le tusitala se kopi o le tusi ma faaupuga o loo iai, peitai o le a lē faasalalauina se‘i maua se faatagaga mai Alii ma faipule o lea afioaga.
Faaalia e le minisita o loo faaauau lava ona faatau le Tusi faalupega i le lomiga lona lua, e le gata o Samoa a o atunuu i fafo o loo aumau ma nonofo ai le toatele o tagata Samoa. Ua faailoa mai foi e le minisita e lei lolomiina kopi e lima selau o le a tuuina atu i ofisa o Hai Komesina ma Konesula o Samoa i fafo latou te faatauina le tusi.
