O se tina 36 tausaga le matua e toavalu ona alo na faasala i le falepuipui ia Setema o le tausaga ua mavae mo le 3 tausaga ina ua ia ioeina le solitulafono o le toe faiaiga ma lona tamā moni, ua faatonuina e le faamasinoga o talosaga apili e faasaoloto mai le falepuipui ma ua lava ma totoe masina e valu ua mae‘a tuli o lona faasalaga. Peitai o lona tamā ua lata i le 60 tausaga o lona soifua e nofo mau i fafo na faasala i le totogi o se vaegatupe e tusa ma le sefulu afe e aofia ai le lima afe na te totogi i le afafine na aafia.
Ua faatonuina e le faamasinoga o talosaga apili le suia o lea vaega o le faasalaga i le faafalepuipui o le tamā mo le umi e 12 masina.
O le faasalaga lea e taofia ai le faaiuga na faia muamua e le faamasinoga maualuga e totogi i le tamaitai le lima afe.
O le mataupu lenei na faia eseese faaiuga a le faamasinoga maualuga lea na eseese foi faamasino na tagofia.
O le tasi o faamasino na faia le faasalaga o le tamaitai ina ua ioe ma sa faaalia i ia taualumaga a le faamasinoga o le afafine na taulamua i le faatupuina o le solitulafono.
Peitai ua faaalia e le faamasinoga o talosaga apili sa tatau ona silasila le faaiuga i le talaaga o le mea na tupu lea sa talitonuina e le tamaitai lona tamā moni na toe sau mai Ausetalia e fia feiloai i ai, ona sa fanau ma ola a‘e lona afafine i lona toalua muamua e lei vaai i ai, ina ua alu ese le tamaloa ma Samoa mo atunuu i fafo ae faatoa 27 tausaga o lona matua.
O le foi mai o le tamaloa ma mafuta ma lona afafine i nai tausaga e lei mamao tele atu, sa tausia lelei o ia e le afafine i le talitonuga atoatoa e le o se isi o lona tuaa moni, ae peitai na faatino ai e le tamaloa le solitulafono.
I le silasila a le faamasinoga o talosaga apili o le afafine na matua aafia lona tulaga saogalemu i le gaioiga ma ua masofa ai le va tapuia ma lona toalua faaipoipo ma lana fanau e toavalu ma o se itu sa tatau ona mamafa i ai le silasila a le faamasinoga, aemaise sa tatau ona mamafa le tagai a le faamasinoga i lana iuga i le faasalaga o le tamaitai na faia e le nuu lea lea e le gata o tupe ma taumafa na ave ae na aofia ai ma le faatulai ese.
O le solitulafono o le mataifale na faamaonia faasaga i le tamaitai sa faasala ai i le tolu tausaga i le falepuipui lea na amata tuli i le tausaga ua mavae i le masina o Setema.
O le tamā moni o le tamaitai e lei faia i ai se faasalaga faafalepuipui ae suia i le faasalagatupe e sefulu afe tala ona sa talosagaina e lana loia se salatupe maualuga ona e fia foi i Ausetalia lē ua molia.
Na talia e le faamasinoga le taalosaga e ui o lea ua fai mai le faamasinoga o talosaga apili, e toe aumai e tulai i le faamasinoga mo le faia o lona faasalaga faafalepuipui e 12 masina.
O le vaiaso a o sauni le atunuu i le faailogaina o le Tutoatasi sa amata ai galuega a le faamasinoga apili e Peresitene ai se alii faamasino mai Niu Sila ma isi faamasino mai fafo e toalua.
E le o iloa le taimi e toe aumai ai i Samoa le tamaloa ua faia i ai le faaiuga e suia le isi vaega o lana salatupe e lima afe i le nofosala i le toese mo le tausaga atoa.
