Faasaoina le Forum Samoa II na paulia i Mulinuu

Toetoe atoa le vaiaso o paulia ma to‘a le vaalauoloa o le Malo o Samoa, le Forum Samoa II i se vaega o le aau i gataifale o Sogi ma Mulinuu e latalata i le gutu o le ava o loo ofi atu ai vaatetele i le uafu autu i le taulaga i Apia. Peitai o le taeao o le Aso Tofi, 3 o Setema 2009, na manuia ai taumafaiga a vaa tosovaa ma inisinia o le pulega o uafu faapea se au maulu mai Niu Sila.
E lei taina le valu i le taeao o le aso lea ae vaaia ua mamulu ese mai le vaa ma le aau ma faapea ona toso atu loa e vaa tosovaa poo tug boats i se vaega mamao ese mo le siakiina atoa o le vaega i lalo o le vaa.
Na faaalia mai e le Pule Sili o le Matagaluega o Galuega ma Atinae tetele a le Malo le tofa Vaaelua Nofo Vaaelua i le tusitala o lenei nusipepa, e iai le talitonuga, o le pe o le matagi ma ua to‘a foi le sami na mafai ai ona matagataga se vaega i lalo o le vaa lea sa mau ma lē mafai ai ona toso ese i le amataga o galuega laveai.
Na atili le maua se fesoasoani ona o le malosi o le matagi o le tuaoloa ona sa fiu vaa tosovaa ae le migoi le Forum Samoa II.
Ua faailoa mai foi e le Pule sili o le Matagaluega o Felauaiga ma Galuega tetele a le Malo e le o iai ni lipoti o ni aafiaga ogaoga o le vaa ae sa faia ni faataitaiga i fafo atu o le uafu sa fia sailia ai pe o mama ma sao mai i fafo ni suauu.
“O le tulaga faafetai lena ona e foliga mai ua uma faataitaiga e leai se mea tele o le tatou Sa o faaletonu.
E faafetaia ai le lagolago a le toatele sa feagai ma galuega laveai, aemaise o le tapuaiga a le Malo ma le atunuu”, o se finagalo lea o le Pule Sili.
E le o iloa se umi o le a faia ai siaki i le vaega i lalo o le vaa mo le fia faamautinoaina o loo saogalemu vaega uma mo le toe faaauauina o le tautua a le Forum Samoa II ua umia nei o se meatotino a le Malo o Samoa ma le atunuu. E tusa lona tau ma le $20 miliona na faatau mai ai i se kamupani Siamani ma le kamupani vaa o le Pacific Forum Line.
Ua taua e le Pule sili e iai se komiti ua filifilia e le Malo latou te suesueina le mea tonu na tupu na mafua ai ona paulia ma toa le vaa.
“O le a fesiligia uma lava le kapeteni ma le auvaa ia matou suesuega”, na saunoa ai Vaaelua Nofo.
E iai ni faamatala ua maua e le tusitala ae e lei faamaonia, na taua ai o le po o le Aso Faraile, 28 o Aukuso 2009 na faia ai se fiafia a le Malo ma le PFL e sami ai le umia e Samoa o le vaa, ae malama ane le taeao ua paulia.
Fai mai nisi o molimau sa faaletonu afi o le vaa ina ua toe foi e taula i gatai ane o le uafu tele i Apia ma faauma ona faatumu pepa masani pe a taunuu, peitai na avea lea tulaga ma mafuaaga na faafuasei ona faaletonu ai afi ma tafea ai loa agai i le aau a o malosi le matagi i le taimi lea.
E faatoa iloa tonu le mea na tupu pe a maea suesuega o loo faia. O le paulia o le Forum Samoa II na mafua ai ona oso le vaa fagota o le Tifa i Moana i se vaega o faga oneone o loo i gatai o Mulinuu.