Ua mae‘a nei le faamanatuina o le 50 tausaga o le Tutoatasi o Samoa, ae o ni lagona lē fiafia o loo faalogoina pea talu mai le faatinoga o tuugavaa e taualuga ai le faamoemoe o si o tatou atunuu.
E le o se faitio ae o se lapataiga e ao pea ona momoli atu auā le silafia malamalama o le tatou atunuu ina ia saga faamanino atili ai tala sese ma le faasalalauina mai i le leitio e aunoa ma le saili o le mea sa‘o.
Na iai le talitonuga e faatafea ia fatia i nuu lē ‘ainā, ae alo i luma le folauga mo se ‘ai lelei mo le lumanai o nei lava mea o faafiafiaga aemaise ai o tuugavaa.
Peitai fai mai le upu a lē faasa‘oina le sese e tupu pea lava. Na faasalalauina mai le leitio i Samoa e se tasi o le aufaigaluega o se leitio i Niu Sila nei (taofia le igoa) e faapea i le taimi lava na taunuu ai le tuuga i Matautu, na ia faapea mai ai o loo ua foliga mai ua toe tauaimisa lava le auvaa a le Tolotolootamauli, ma o lea ua taunuu mai taavale a le falemai e ave ai le ‘aumanunu‘a.
O lea na fesootai atu i le mataupu lea i aiga i Salelologa ma na faasa‘o mai ai e leai se misa a tama o le ‘auvaa na faia. O le tama ta‘apa na lavea ina ua filivaa le Tolotolo o Tamauli ma le vaa a Apia lea na manu‘a ai ma sa manaomia se togafiti mo ia lea na oo atu ai taavale a falemai.
O isi foi tama e toafā na pa‘ū‘ū i le sami na lē maua lava se avanoa e alo ai i le tuuga ina ua alu pea le tuuga ae sa faapea le kapeteni e toe taofi ae amata lelei le tuuga, ona sa filivaa lava vaa ia e lua i le amataga.
E ui lava ina lē atoa le ‘auvaa o le Tolotolootamauli, ae na maua lava se tulaga lelei i le tuuga. O lea faafetai ma faamalo atu i le ‘auvaa le faafiafia loto mai i le autapua‘i atu i atunuu mamao.
Ua mae‘a foi ona soalaupule i le avafatafata ma le aganuu faaaloalo lea mataupu i le va o afioaga e lua ma e avatu ai le faamalo ma le faafetai tele i le tapuaiga a alii ma faipule o Salelologa ona o le tofa loloto ma le faautaga o‘oo‘o aemaise le finagalo kerisiano ua mafai ai ona foia ia fatia.
E faapena foi le agaga faafetai i le afioaga o Apia i le agamaulalo ma le faatinoina o le ifoga e pei ona tuugamalie ai lea faaletonu.
E momoli atu le faamalo faapitoa i lau afioga Tago ma le toe faamanino mai i le Foafoa o Aotearoa lea tulaga, ua mafai ai ona to‘a le sou sa feagai ma finagalo o tagata Salafai i lea tulaga.
E ui lava o Salelologa e ona le vaa ma le ‘auvaa ae faalogoina ma molimauina le opogi e Salafai atoa lo latou sa e tasi na alu i le tauvaga o tuuga.
Malo le faatamaalii ma le ulugia i finagalo faaaloalo o tou finagalo mafatia. E malo lava i latou e sailia le filemu moni mai le Atua e pulea ai se faaletonu mai o isi tagata.
O le lauga faaamuia a Iesu i le Mauga: Amuia e faatupuina le filemu, aua e ta‘ua i latou o atalli o le Atua”. O outou lava o fanau faamaoni a le Atua e ala i o outou faiva alofilima o le sailia o le aganuu faaaloalo i le agamalu, e faatonutonu folau ai le malaga o tatou savalia pea i lenei tausaga.
E faamanuia atu i le Tolotolootamauli ma le tapenaga mo le isi faagatama. Manuia le alo atu mo le tauvaga o tuugavaa i le Teuila ia Setema!