O le vaiaso lenei na amata ai ona vaaia le tufa o se fesoasoani mai i le kamupani o le Origin Samoa poo le Boral Gas i Samoa ma Amerika Samoa mo le mamalu o le atunuu ia ua faamauina le matuā aafia lava i le leai o ni fale mafua mai i le afā o Eveni.
O lea fesoasoani e 200 fagu kesi ma le 200 ogaumu kesi mata tasi. O le afioaga o Magiagi na mafai ona molimauina le tauaao atu o lenei meaalofa i le afioaga ma o le faafetai a le alii pulenuu o le afioaga le afioga Tuiono Uini Keni, ona o lea faamāmā avega i le toatele o aiga e lei maua lava le eletise.
O le ‘afa o le afioaga o Magiagi ua leai ni fale e nonofo ai ona sa faamautu i le itu lea e i le vanu o le afioaga lea e iai le vaitafe ma ogapaipa a le pulega o le Suavai ma le Faalapotopotoga o Malosiaga tau Eletise.
O le nofoaga la lea ua matuā tele fale na tafefea ina ua pa le vaitafe tele lea ma le faatanoa o loo taatitia lava i le taimi nei e lei faatinoa i ai ni galuega toe faalelei.
Faaalia e le Pulenuu o le toatele lava foi o i latou e lē o iai ni fanua ma ni aiga i le vaega o le nuu lea e i luga o loo faamautu lava i le lotoā o le Ekalesia Asofitu o le toe Afio Mai ma le lotoā a le Ekalesia a Iesu Keriso o le au paia o aso e gata ai, ma o i latou nei o loo tau faatali lava ni fesoasoani mo le toe fausia o o latou fale i nofoaga na afaina i le afā o Eveni.
O i latou foi ia na maua uma le fesoasoani lenei a le Origin Energy i le faaiuga o le vaiaso na se‘i mavae atu nei. O loo ua mafai ona faaaogā nei ogaumu mata tasi ma fagu kesi i nofoaga nei ua faamautu ai mo se taimi i latou nei. Na faasalalau e le Malo o lea ua tapunia uma lava nofoaga sa sulufai i ai le toatele ae e lei tuua lava e nisi o aiga ua matuā tetele aafiaga o o latou fanua ma meatotino lotoā e pei ona ta‘ua, ona o le leai lava o ni nofoaga e agai i ai.
O loo finauina pea i le taimi lenei le tulaga e ono oo i ai se fesoasoani e ono ofo atu i nei aiga i le taimi lenei ae ua faapea mai le malo e tatau lava ona agai le aiga latou e toe fau o latou fale ae o le toatele i Magiagi e tatau lava ona agai i nisi tauaiga mo lo latou saogalemu i le lumanai ona o le ogaoga o aafiaga na tulai mai i le pa ai o le vaitafe ma e toe tupu foi.
