Faasafua e le Malo le 5 miliona mo aoga Tumaoti ma Aoga a Ekalesia

E 5 miliona le tupe ua faasafua atu nei e le Malo e fesoasoani ai mo le atinaeina o Aoga a Ekalesia ma Aoga Tumaoti i totonu o le atunuu. O lea faamoemoe na faatautaia i le Potufono a le Kapeneta i le Aso Lulu 22 Me 2013.
O fesoasoani masani ia a le Malo i tausaga taitasi, o le tuuina atu o seleni mo ia aoga aua le faaleleia atili o vaega mo aoaoga a alo ma fanau o le atunuu.
E pei foi ona i ai lea taeao, na saunoa ai le Afioga i le Palemia, Susuga Tuilaepa Dr. Sailele Malielegaoi, e faalauiloa aoga ua faamanuiaina i lea faamanuiaga a le Malo.
I lana saunoaga na ia faaalia ai nisi o faamoemoega o le Malo, e tusa ma le siitia atili o tulaga tau aoaoga a alo ma fanau o le atunuu, aemaise nisi o mataupu e ao ona toe silasila ma tagatagai iai.
O le se tasi o mataupu na saunoa iai le Afioga i le Palemia, o loo taatia i le laulau a fono a le kapeneta le pepa i le aoaoina o mataupu tau faasaienisi.
Na taua e le Afioga i le Palemia, o soo se atunuu lava e moomia le toatele o i latou e aoaoina i mataupu tau saienisi. Ua taoto faiga faavae e pei ona saunoa Tuilaepa, ina ia siitia le tulaga o tamaiti Samoa e aoaoina i mataupu e pei o le Agriculture Science.
“E toatele e mafaufau a aoaoina i mataupu ia, ona faapea lea e na o le totoina o fa’i, talo taamu ma fualaau aina. A e manatua foi, o Samoa lava ia e galulue ina ia atinae o lona tamaoaiga e le gata o totonu o aiga aemaise o le atunuu atoa.”
O suiga o le taimi na toe fautuaina ai foi e le Palemia ulu o aoga ina ia toe tagatagai iai, ona o loo maitauina o loo i ai lava aoga a sui le taimi e tumau pea taimi amata o aoga.
O le suiga o le taimi e pei ona faaalia e Tuilaepa, na afua ona fai, ina ia faasao mai ai le faaaogaina o le eletise.
E le gata i lea ae mo le au faifaatoaga ina ia maua pea le taimi e galueaina ai le faatoaga i soo se taimi, aua e uma lava galuega o le aso o loo malamalama pea.
E oo foi i tulaga tau taaloga ua toe fautuaina ai foi Pule Aoga ina ia tagai i amio o tamaiti ina ia pulea lelei. “A tumau le faiga o tamaiti aoga e faiaoga ma Pule Aoga, e leai lava ni fetauaiga o aoga i itu tau taaloga.”
“Outou Pule Aoga, afai e faatupu misa se tamaititi aoga, ua tatau ona faamuta le aoga, alu i le aiga e toto le fa’i ma toto le talo e fesoasoani ai i le aiga.”
Na toe lagaina foi e le Afioga i le Palemia, le tulaga o faiaoga lima tete i tamaiti, ona o nisi o faalavelave ua tutupu e mafua ona o faiaoga.
“Ia fai le tou galuega ma le onosai ma faapalepale. E tele auala e taofia ai tamaiti ulavavale.”
O le faasafuaina o lea seleni o loo fuafua lava i le aofaiga o tamaiti o loo aoaoina lava i totonu o aoga.