Faasa ona toe tapuai leotetele le Worship Center

O se vaaiga fou le tietie atu agai i Mulinuu i po o Aso Sa ua leai ma ni taavale i le vaega o le fanua i Sogi lea e faatu ai le Ekalesia o le Worship Centre lea e masani ona tumutumu i po o Aso Sa ma Aso Faraile i tapuaiga masani a le Ekalesia. Ua mafua lea ona o le faaiuga a le Faamasinoga Maualuga lea ua faia e faatatau i le tagi a le Faletalimalo o le Millenia lea na ave ai le Ekalesia i le Faamasinoga. O le tagi, ua le maua se malologa a a latou malo ona o le pisapisao o tapuaiga a le Ekalesia ma ua iai nisi o malo a le Millenia ua o ese ona o le leotele o nei tapuaiga.

E tolu poloaiga a le Faamasino o le Faamasinoga Maualuga, Afioga Vui Clarence Nelson i lenei mataupu.
Muamua, ia taofia le toe faatautaia o sauniga lotu a le Worship Centre i lona nofoaga mautu i Sogi mo le taimi nei seia maua se auala e mafai ai ona tuutuu i lalo ana sauniga i Aso Sa.
Lua, ia faasa ona toe faatautaia ni sauniga sa masani faatautaia i Sogi i po o Aso Faraile, sei vagana e mafai e le aulotu lenei ona tuutuu ifo i lalo leo o a latou tapuaiga i le maualuga faatulagaina o le leo e pei ona aiaia ai e le tulafono.
Tolu, ia aua nei sili atu i le itula e 10 i le po sauniga pe a faatautaia i le nofoaga o le Worship Centre i Sogi i po o Aso Toonai.
O le sauniga lotu a le Worship Centre i le Aso Sa na sei mavae atu nei na faatautaia lea i le Maota o le Tuutuu i le Loloto i Matafele. O le nofoaga lea na avanoa mo le latou sauniga talu ai sa faaaogaina e le Ekalesia Katoliko luma maota o le Maota o le Malo i le Eleele fou aua a latou sauniga lotu mo lana fono a le itulagi na faatautaia i Apia.
O luma maota lava o le Fale o le Malo lea ua avanoa e faaaogaina i le taimi nei e le Ekalesia.

O le Tulafono
O le iloiloga o lenei mataupu na faaalia ai e le sui o le vaega o loo nafa ma tulafono o fuafuaga ma mataupu faapenei i le taulaga o Apia le PUMA – na molimauina ia latou suesuega le maualuga tele o le leo o tapuaiga o loo sau mai i le faleie lea e faatautaia ai lotu a le Worship Centre.
O le maualuga lava e tatau ona gata mai ai le leo o se tapuaiga poo le leo e sau mai i falekalapu, faletalimalo ma isi potopotoga toatele o le va i le 52 i le 57 decabels (le fua lea o le leo). O le maualuga o le lauga na taua e le alii na fuaina sauniga lotu a le Worship Centre, na oo atu ai i le 57 decabels. O le maualuga o le patipati o aao na oo atu i le 65 decabels. O le maualuga o le pepese o le isi taimi na oo atu i le 83 decabels ae na toe pau mai i lalo i le 73 decabels.

Tali a le Worship Centre
O le maea lava o le fonotele a le Worship Centre lea na faatoa taape le toatele na malaga mai ai i le vaiaso ua tuanai na mafai ai loa ona faatalatalanoa le faaiuga a le Faamasinoga e le Taitai o le Ekalesia o le Worship Centre, le Susuga i le Faifeau o Viliamu Mafo’e. Na ia taua ai talu ona amata mai tapuaiga i le nofoaga tumau o le Lotu i Sogi, na oo atu faitioga ona sui lea o le latou masini faaleotele leo (PA System). Maea lea ae toe avatu foi faitioga ona taumafai lea o se isi faiga ina ia faaitiitia ai le leo ua taua o le Surround Sound o le leo lea o le masini ua faataape ai ae ua le tuufaatasia faaleotele leo (speakers) ina ia taape ai le leo mai i totonu o le faleie ma na mautinoa le tuuitiitia o le leo.
“E faalima lelei ona fua e le PUMA le leo o a matou faigalotu ma na omai foi sui o le PUMA ma faapea mai o loo leotele lava le leo,” o se saunoaga lea a Viliamu Mafo’e. “Na ave foi i ai la’u tusi ma ou fesiligia ai le latou masini lea e fua ai le maualuga o le leo o le matou tapuaiga, ma na ou fai lava i ai pe mafai ona aumai le latou masini lea e faaali mai ia i matou le maualuga ua iai le leo ona matou galulue faatasi lea e vaai se auala e faaitiitia ai le leo i le maualuga e tatau ona iai ae ia matou tilotilo i le masini lea peitai e oo lava le mataupu i le Faamasinoga ma ua aumai foi le faaiuga a le Alii Faamasino, e lei oo mai lava sui o le PUMA e aumai le masini lea ua fua ai le leo o le faigalotu”.
“E pei o lo’u faanoanoaga lava lea ona o le le oo mai o sui o le PUMA ma le masini e faamaonia ai le maualuga o le leo o a matou faigalotu ae o lea lava ua aumai le faaiuga e aunoa ma so matou manino lelei i le fuaina o le leo o a matou sauniga. Na ou fai foi i ai a tou vaai i masini radar ia e fua ai le saosaoa o taavale e avane lava e te vaai i ai i le saosaoa ua oo i ai lau alu, ae o lea e na ona tuuaia o le leotele ae e lei iai se masini e aumai matou te vaai i ai”.

Faaalia e le Susuga ia Viliamu Mafo’e e tatau lava ona toe silasila le au faitulafono i se teuteuga o le tulafono faatatau i lenei mataupu. “Aua o tapuaiga e le taofia, o le mea e lelei ai Samoa, e leai lava se isi mea o ala mai ai manuia o le atunuu sei vagana tapuaiga lotu, ma e tatau ona iai se isi fuafuaga i nei mataupu faapea aua e le mafai ona taofia tapuaiga lotu”.

Faaalia foi e le taitai o le Worship Centre e le o iai se mafaufauga o le Ekalesia e o ese ma Sogi o le nofoaga mautu lava lea o le Ekalesia ae o loo vaavaai nei i se auala e mafai ai ona saoloto tapuaiga e aunoa ma le fautuaina i le tulafono.