Faasā ona toe susunu le vaomatua

Ua faailoa lautele nei le poloaiga ua tapu ma faasā ai ona toe susunuina le vaomatua o afioaga uma mai Letui i Neiafu i Savaii. E tolu masina le umi o le tapu na amata i le amataga o le masina nei o Iulai, ae faato‘ā mae‘a i le faaiuga o le masina o Setema.

I le pepa o faasalalauga mai le Komesina ma le pulega o le auaunaga tineimu ma galuega laveai, ua talosagaina ai le pule mamalu a Alii ma Faipule o nuu uma ua aafia i le poloaiga, ina ia lagolago atu i le taofia o le toe susunuina o le vaomatua, ina ia alofia ai le tulai mai o ni mu tetele o le vaomatua i lea vaega o Salafai.

O aiaiga o le tulafono o le pulea o vaomatua i Samoa na pasia e le Palemene i tausaga e lei mamao atu, ua faavae ai le poloaiga ua tapu ai ona toe susunu le vaomatua mai Letui i Neiafu. O nisi ia o vaega o Savaii e masani ona aafia tele i mu i taimi o mugala ma tau lē maua ai se suatimu e pa‘ū i ia afioaga. Ua mafai ona faasalaina soo se tasi i se faasalaga tupe ma le falepuipui pe a lē usitaia le poloaiga ua faia nei, ma o se poloaiga foi o le a mataitu e le vasega o leoleo.

O le tausaga ua mavae na aafia ai se vaega tele o fanua i Asau ma Aopo faapea Letui i se afi tele i le vaomatua. E lua vaiaso o galulue leoleo ma le vasega o le fuimu e tau titina lea afi tele. Sa sili ona faigata le galuega ona sa iai tagata sa masalosalo i ai na latou susunu vaega o le vaomatua. Na molia ai foi nisi i lea gaioiga ma faasala e nuu i le pule mamalu a Alii ma Faipule.

E pei ona silafia o lea vaega o Savaii e papa ma tele ai le soata poo maa, ma e faigata tele pe a oo ina mugala ona e magumagu ai le vao ma le laufanua, ma e vave lava ona apo e se mu e faia i le togavao aemaise lava o galuega a aiga i le faato‘aina o le eleele i faatoaga.

Ua faaalia e le Komesina o le pulega o le fuimu ma galuega laveai, Fire and Rescue, o le lagolago a matai o nuu ua aafia i le Tapu poo le Sā, o le a mafai ona foia ai ni faafitauli e toe tulai mai i vaomatua o ia afioaga.

O Setema o le a faato‘ā mae‘a ai le tapu ma faato‘ā mafai ai ona susunu le vaomatua o ia nuu mo galuega o faatoaga.