Ua faatonuina e le Vaega o Auaunaga Faaloia a Niu Sila (Legal Service Agency) le taofia o fesoasoani tau tupe, atoa ai ma le toe faaaogāina e le ofisa loia o Sapolu, o auaunaga saoloto mo tagata lautele, i le faatinoina o galuega fesoasoani faaloia i le va ma le tulafono.
O galuega tuusaoloto mo tagata lautele e fesoasoani ai mo i latou e vaivai le tamaoaiga, ma e lē gafatia ona totogi le tau o loia mo le faatinoina o galuega i totonu o fale faamasino, ua lē toe agavaa ai nei Iuni Sapolu ma le tamaitai o Josefine Fuimaono Sapolu.
E tusa ai ma suesuega sa faataunuuina e le LSA, ma lipoti sa faamatuu mai mo le au tusitala, o loo faamaonia ai le taofiga ma tapu ua tuuina atu mo le ofisa loia o Sapolu. E iai mafuaaga o loo ta‘ua i se pepa o faamatalaga sa tuusa‘o mai lava mo le au faasalalau ma le au tusitala, mai le vaega a le Legal Service Agency.
O vaega nei ma tuuaiga o loo mulimuli mai, sa mulimulitai i ai, ma faavae ai foi le faaiuga sa faamatuuina.
Tuuaiga
O loo tuuaia le ofisa loia o Sapolu i vaega uma nei:
Lē ausia le tulaga maualuga sa tatau ona iai le faatinoina o galuega faifai pea.
Lē faamaoni i le tilivaina ma le faatinoina o galuega fai.
E lē o faafeiloaia le manaoga masani ma tulaga moomia e pei ona aiaia e fesootai ai ma le LSA.
Maualuluga le tau poo totogi o loo tuuina mo ana galuega faatino.
O vaega uma e pei ona ta‘ua i luga, o loo faapea mai le LSA, sa maua i suesuega faapitoa sa faataunuuina, ma ua lape ai le auaunaga a le ofisa loia a Sapolu. O le faave lea o le latou faaiuga e taofia ai ma faamuta le toe maua e Iuni Sapolu ma Josefine Fuimaono Sapolu o faamanuiaga mai le malo i le tulaga tau seleni.
E lē gata i lea, ua tatau ai foi ona faamuta ma le faaaogāina o lea avanoa sa fesoasoani ai mo tagata lautele i mataupu tau faamasinoga, ae totogi mai e le malo a latou pili (Legal aid work).
O se faaiuga ua malosi tele ma e iai foi le talitonuga o le a lē gata ai suesuega i le faaiuga ua faia, peitai e ono oo le mataupu i le asosi a loia o le atunuu, aemaise o le matagluega a leoleo.
E lei gata le taumafaiga a le Samoa Times i pepa o faamatalaga sa tuuina mai i le ofisa loia o Sapolu, peitai sa agai pea ma tulituliloa le tamaitai loia, i le fia maua pea o sona finagalo faaalia i le mataupu e pei ona faasaga atu ma tuuaia ai lona ofisa.
Le feiloaiga ma Iuni Sapolu ma nisi o loia o loo galulue i lona ofisa i Manurewa.
Samoa Times: E lē toe tau faailoaina le mataupu ua mafua ai ona fia maua se talanoaga ma lau susuga i le loia.
E leai foi se isi e sili ona iloa lelei ma malamalama i le lotoifale o la outou galuega, ua na o outou lava. Ae o le fesili, O le ā se aafiaga o tagata lautele aemaise lava o tagata Samoa, sa masani ona e fesoasoani i ai, e lē gata i le faaaogāina o le gagana e fesootai ai ma faamalamalama ai mataupu loloto ma le faigata.
Ae faapefea le tulaga o le totogi o galuega mo i latou e vaivai tupe maua ma le tamaoaiga. E foliga mai o le lē toe maua lea faamanuiaga sa fesoasoani ai mo tagata Samoa ma le lautele.
Iuni Sapolu: O le aveesea o galuega faapea mai le ofisa loia o Sapolu, e lē o se tulaga lelei mo tagata lautele, aemaise lava o tagata Samoa ma le Pasefika. E moni lelei lava o le aafiaga tele lea mo tatou lava ia tagata Samoa.
O le lē toe mafai ona matou faatinoina le fesoasoani sa iai, aemaise lava o le faaaogāina o le gagana.
O le a lē toe maua foi le taugofie ma le faia fua o le tautua ma le faatinoina o galuega e pei ona sa sau ai i tausaga e tele.
O le tasi lea auala sa oo atu ai le fesoasoani mo aiga e tau faasoasoa le seleni, auā sa totogi mai e le malo le faatinoina o o matou tiute, ae saoloto ai tagata lautele.
Samoa Times: Se‘i aumai sau saunoaga e uiga i vaega ia ua tuuaia ai lau susuga ma le ofisa. Muamua e faapea mai ua lē lava agavaa ma le atoatoa, aemaise o le leai o se faamaoni e faatino ma faamausalī ai le tulaga maualuga faapolofesa o galuega?
Iuni Sapolu: O le mea mautinoa mo le silafia, o faaseā ma tuuaiga ua faasaga mai ia a‘u ma lo‘u ofisa, e lē mai tagata sa faaaogāina la matou tautua, pe o i latou sa matou fesoasoani i ai (clients).
O le mataupu lenei e afua mai i nisi lava o ofisa loia atoa ma loia taitoatasi. O faaseā ma tuuaiga uma sa faia e loia a le malo o loo i totonu lava o le vaega lenei a le LSA.
O se faiga e lagolago ai le isi foi vaega lea a le malo e tau faaofi mai e faaigoaina o le Public Defence Services, ma o i latou ia o loo taumafai e aveesea tiute ma galuega faa Legal-Aid lea o loo matou mauaina.
O le matou la talitonuga o le suesuega sa faia e le LSA, e lē tonu ma o loo iai le faaituau, e lē faamaoni ma e feteenai foi (conflicts of interests), talu ai o i latou lava e tasi lea e ona faaseā, a o latou lava foi ia sa faia le faaiuga ua tuuina mai.
Samoa Times: O loo faapea mai le isi tuuaiga, e lē o maua le tulaga masani e tatau ona iai mo le tilivaina o galuega, aemaise o aiaiga e fesootai ai ma le vaega lea sa aumaia le faaiuga, LSA.
Iuni Sapolu: E matou te toe faafoi lava tuuaiga o le lē faamaoni, matou te toe fesiligia pea lava le vaega lea pe faamaoni le suesuega sa faia.
O le ata atoa o le fuafuaga lea ua mafua ai lea gaioiga, o lea ua taumafai le LSA e unai malosi mai le Public Defence Services, ina ia manumaloina galuega fesoasoani nei (legal-aid works) sa matou tauaveina, aemaise lava matou nei o loo fai lava a matou ofisa loia.
E lē gata i lea, ao le taumafai ina ia faaitiitia galuega e tuuina mai ia matou, ae ia nofo ai pea lava i totonu o le lio o loia a le malo, ma ia nofo ai foi ma le tupe e lē toe agai mai mo matou (private lawyers).
Aemaise lava lenei vaitaimi o le leaga o le tamaoaiga, ua taumafai foi ina ia faaitiitia seleni faaalu a le malo. O le matou finau o loo iai lava le feteenaiga i le va o i latou ma le latou galuega. (conflicts of interests ).
Samoa Times: O le isi vaega o tuuaiga o loo ta‘ua ai e faapea ua maualuga tele, ia pe ua taugata tele le totogi o outou ma a outou galuega, nai loot au faatulagaina e laugatasia uma ai loia. E sao lea tuuaiga ?
Iuni Sapolu : E tele ma anoanoai a matou galuega tetele sa faia, o matou tiute foi e masani ona faaalu ai taimi e tele ma sili atu foi nai lo taimi faigaluega.
O le tele o ia galuega e le totogia, e faia fua ona o le fia fesoasoani.
O tau foi o matou galuega o loo faaogaina lava tau masani e tutusa ma le tele o loia.
E taugata tele taimi ma itula o loo faaaluina mo le vaavaaia ma fesoasoani ai mo isi loia faatoa amata, ina ia ausia le tulaga maualuga e mafai ai ona faatino le galuega.
O loo totogi lava au ma lau aufaigaluega i totogi masani, e leai ni totogi soona faia e faapea ua sili atu nai loo totogi faatulagaina. E aupito maualalo lava foi a matou pili aua e malamalama lelei i tagata o loo agai mai ma o latou faafitauli.
O fea la e aumai ai faamaumauga a i latou sa faia le suesuega ma tuuaia ai lenei auaunaga.
Samoa Times : Ua aumai le faaiuga a le LSA, ae faapefea le Sosaiete poo le aosi a loia (Law Society), O le a sa latou tala? O fea e tu ai le vaega lea?
Iuni Sapolu : E oo mai i le taimi nei, e lei maua sa matou fesootaiga ma le sosaiete a loia e pei ona e ta‘ua, ae iai lo matou talitonuga, e lē mafai ona lē fesootai i ai le LSA ma faailoa i ai. O le a matou faatali pea, poo le ā se tali mai a le faalapotopotoga a loia.
Teena e Iuni Sapolu le faaiuga, sauni e toe ave ma finauina le mataupu faasaga i le LSA i le Faamasinoga Maualuga
E iai foi isi tulaga matou te teena ai le faaiuga ua tuuina mai, matou te lei maua se lapataiga e faailoa mai ai o le faaiuga lea o le suesuega sa faia faasaga i le matou ofisa. Matou te lei iloaina foi, sa faia se suesuega mo i matou ma a matou galuega o loo faia.
E faaauau pea ona matou finau seia maua lava le sa‘o ma le tonu o le mataupu lenei. Matou te lē faavaivai e finauina le mea moni.
O loo ua agai mai lava faiga faapolokiki leaga nei, ma o loo faatutu mai aemaise lava loia tumaoti, latou o loo faia o latou lava ofisa. (private lawyer).
O lea o loo faatali nei le tele o isi loia e aofia ai ma isi foi loia sinia, se‘i o matou talanoa ma vaai poo fea tonu le itu o le a faatūtū agai i ai le matou tagi ma le faaseā. E lē na o matou le ofisa sa agai i ai suesuega a le vaega lenei, e iai foi isi ofisa ma loia taitoatasi sa ave i ai tusi ma faaseā a le LSA.
Sa faamaonia e le Samoa Times i le aso lava lea, le taunuu ane o ni tusi mai isi loia, e faaalia ai lo latou lagolagoina o se tagi faasaga i le LSA. E lē gata i lea ae o loo ta‘ua foi i tusi ma faxes sa maua ane, le tutufaatasi ma Iuni Sapolu ma le ofisa loia, e finauina le mataupu.
O le tusi a se tasi o tamaitai loia papalagi, sa ia tautino ai foi le oo atu o le LSA, ma taofia ana galuega, ae fai suesuega i le matupu lava lea Legal-aid. Peitai e lē o tuua ai fetaliaiga ma finauga o loo faia seia oo ina maua le tala, i le faaiuga sa faia i le Sapolu Law.
O loo tumau pea le maumaututu o le finagalo o le tamaitai loia ia Iuni Sapolu, e lē o iai se faaletonu i le latou faatinoina o galuega mo tagata lautele.
Ma ua sauni foi e finauina le mataupu ua tuuaia ai lona ofisa i le Faamasinoga Maualuga.
