Faapine taumafaiga a fanau ma mātua

O le mitamitaga o mātua ma aiga o le vaaia pea lea o le ausia e fanau o faamanuiaga maualuluga i Aoga ma taleni. I Sini nei o le lagona lava lea ua vaaia i le fua mai o galuega a mātua i le faaaoogaina o fanau ma o latou ausia ai laasaga lelei.
O se meaalofa sili lea mo le afioga a Leuluaialii Lafitaga Tuigamala o Levi Saleimoa ma Fasitootai o loo aumau nei i Minto ma si ona faletua ia Saguu Loreta Tuigamala mai Fogasavaii ma Falealupo.
I le faailogaina o le 50 tausaga o le afioga ia Leuluaialii na faatumulia ai le maota o le Merrylands RSL, na silasila ai foi le mamalu o le aofia i nai o la alo tamaitai ua faaiuiu a la taumafaiga i Iunivesite i Sini nei.
O le tamaitai mātua ia Elaine Tuigamala o le tausaga faaiu lenei o lona faailoga i le Iunivesite o Sini i le tikeri o fesootaiga ma le Malo. O le tamaitai e sosoo i ai o Ashy Tuigamala o lona tausaga lona lua lenei i le sailia o le faailoga o le Criminology poo le sailiiliga o Soligatulafono ma ona mafuaaga.
O se meaalofa lelei lenei mo le Afioga ia Leuluaialii Lafitaga Tuigamala ma le faletua i le ‘oa o le la soifua galulue i Sini nei faapea i le Ekalesia Katoliko a Eaglevale i Sini. Na momoli le faafetai tele a Leuluaialii i lona faletua ma le fanau mo le meaalofa faapea le paia ma le mamalu o aiga na lua.
Na matagofie foi le latou togiga na saunia e le Polynesian Umu Cooker lea e aupito taugofie lana meaalofa mo togiga i ē fia tapena i Sini nei.
I le molimau a le tina ia Saguu Loreta na iloa ai o se tamā toafilemu ma galue malosi le afioga ia Leuluaialii i lana galuega i Sini nei.
O se tamā alofa foi e pei ona vaaia i le fesoasoani tele i meaaoga a si a la fanau e toafā o Elaine, Ashy, Maria ma Edwin.
Na faatumulia lea afiafi i le auvalaaulia e aofia ai ma le Faatonu o le Leitio a le Leo Samoa na Galo le Afioga ia Seiuli Tagaloa Paulo Autagavaia Vaai ma le faletua ia Elaine.
O le afiafi lava lea o le Aso Toonai mai i le itula 2pm-5pm na valaaulia ai Leuluaialii e fai ma sui taumomoli o le Leitio a o tapena faalilolio e le faletua ma le fanau lona Aso Fanau.
Na faateia le tamā i le taunuu atu i le RSL a Merrylands o loo tumutumu mai ai le aofia. O le tofa ia Lefau Su‘e Su‘a na avea ma fofoga o le po ma taualuga ai loa i le faafiafiaga matagofie a le ausiva iloga a le Evana Dance Group lea e taitai e le tamaitai o Priscilla Ale.