Ua iai se tagata faigaluega sinia o le vaega o femalagaa’iga i le Matagaluega a le Palemia ma le Kapeneta ua faamalolo lē tumau, ae se’i faatino le suesuega faalotoifale a lea ofisa ina ia mafai ona maua ai ni mau e tali ai le fesili o loo agai foi iai suesuega a leoleo, pe faapefea ona mafai ona toe faamatuu atu se Tusifolau i le faipisinisi o Tui Vaai Jr, ae o loo taofia lona Tusifoalu Samoa ma le Tusifolau Niu Sila i le ofisa o Faamasinoga.
O aiaiga o moliaga o loo molia ai Tui o le taofi o ona Tusifoalu ia lē mafai ai ona alu ese ma Samoa seiloga ua mae’a ona suesueina ona moliaga o le maua o ni tupe mai ni auala faasolitulafono e ala i le faatauina o se fanua o se isi tagata.
Faaalia e le Pule Sili o le Matagaluega a le Palemia ma le Kapeneta le tofa Agafili Tomaimoana Shem Leo, o le faamalolo lē tumau o se tasi o ofisa sinia o le vaega o femalagaa’iga o faiga masani ia mo tagata faigaluega e tuua’ia ina ia mafai ona sologa lelei suesuega e aunoa ma le faalavelaveina.
E lei faailoaina mai e le Pule Sili le suafa o lea tagata faigaluega ua faamalolo lē tumau poo ua suspend. “O le tulafono a le PSC (Komisi e Pulea Tagata Faigaluega uma a le Malo) o loo aiaia ai le tatau ona faasee ese ma galuega se tasi poo nisi e aafia i ni tuua’iga ae faagasolo le galuega”. O le finagalo lea o Agafili ina ua talanoa iai i le telefoni.
E iai le talitonuga e lē na’o le pau lea o se mataupu tau moliaga e oo i le faamasinoga ae aiaia le taofia o se Tusifolau poo nisi pepa malaga i le faamasinoga ae faatali se’i mae’a ona suesueina le solitulafono. E iai foi nisi mataupu i ni tausaga ua tuanai sa saili atu foi tagata o loo molia ae o loo taofia le Tusifolau, ua alu ese ma Samoa.
O suesuega foi i na mataupu sa fia maua ai le tali o le fesili pe faapefea ona mafai ona alu se tagata o loo molia ae o loo taofia le alu ese ma le atunuu e oo mai lava i le taimi nei e lei maua se tali.
Peitai o le mataupu lea ua suesueina nei o le a mafai ona iloa ai pe na faapefea ona mafai ona toe maua se isi Tusifolau o Tui Vaai Jr e malaga ese ai ma Samoa.
