O le toe suia ai nei o le tofiga o le Miss Samoa Ausetalia e pei ona auina atu i ni nai vaiaso ua tuanai, lea na faamavae ai le tamaitai o Sally Wulf Peterson, ona o le a malaga atu i Dubai mo galuega.
O le afiafi la o le Aso Faraile sa faatumulia ai le Catholic Club Function Room i Liverpool i Sini Niu Sa Uelese, ona o le faapaleina o le tamaitai ua seei mai e avea ma Miss Samoa Ausetalia 2011.
O le tamaitai o Rebecca Sutherton o Bankstown NSW, o se tamaitai e agavaa foi i le silasila a nisi o le atunuu, ona avea ma tofi o Ausetalia i lenei paeaiga o le Miss Samoa Ausetalia.
E lē gata o ona uiga tausaafia ma le laufofoga fiafia ae faapea foi ona fiafia e a‘oa‘o atili lana gagana Samoa, e pei ona molimauina i le po sa faapaleina ai o ia i ana saunoaga faasamoa.
O Rebecca o le alo o Alieta Fouvale mai le afioaga o Auala Savaii, ma Howard Sutherton mai Wales Great Britain.
Sa faafeiloaia e le tofa a Taefu Patea Taefu le paia ma le mamalu o le auvalaaulia faapea faafeagaiga sa potopoto i lea afiafi. O le faafeagaiga EFKS susuga ia Rev Iakopo Leleimalefaga sa taitaia se sauniga amata ona faagasolo loa lea o polokalame.
O le tamatai Miss Samoa Ausetalia 2009-2010 Grace Schmidt Alai sa vaavaalua ma le tofa ia Taefu Patea e fai ma fofoga o le po.
Sa maua se avanoa e saunoa ai le Peresitene o le Komiti a le Miss Samoa, Talevu Koleta Galumalemana e faamalamalama vaega uma. Na tuuina atu aloaia e Sally Wulf Peterson le pale e faapaleina ai le tamaitai o Rebecca Sutherton ma ia faamanuia atu i le faaauauina o le tofi.
Sa lei mafai ona auai mai le High Komesina o Ausetalia e pei ona valaaulia le afioga ia Lemalu Tate Simi, ona o ona tuatuagia, ae sa auai Fonoti Lutiano ma le faletua ia Katie e fai ma sui o le Hai-Komesina.
O nisi sa maualuga ai le aso sa auai, susuga i faafeagaiga ma faletua, o le Peresitene o le Fono Aoao a Samoa i Sini, le tofā Sitagata Atonio Tominiko, afioga a Mata‘afa Mafi Mata‘afa (Youth Co-ordinator) o ia e vaaia uma le tupulaga talavou i totonu o le Fono Aoao a Samoa i Sini ma o la faletua.
Sa auai foi le susuga i le alii loia le tofa a Malagamaalii Sonny Wilson ma le faletua ia Lagi. Na mae‘a ona alo lea i faafiafiaga matagofie sa alo atu i ai le autalavou mai le EFKS Canterbury (Pacific Express) o le autalavou lea a le tamaitai o Rebecca lea ua pale mai nei.
Na iai le faamoemoe e tauaaoina e le tamaitai o Sallie nisi o ata sa pueina i le maota o le Hai-Komesina i sana malaga asiasi peitai o lea ua faamavae, lea la na maua ai loa le avanoa e tuuina atu ai nei ata i le sui sa auai, Fonoti Lutiano e tauaaoina atu i le afioga ia Lemalu Tate Simi.
Ua mae‘a ona soalaupuleina e le Komiti le fuafuaga talu ai ona o Sally sa malaga atu i Samoa i le tauvaga i le Teuila o le tausaga nei, o lea la ua filifilia ai le tamatai o Rebecca Sutherton o le a malaga atu i Samoa ia Setema 2011 e tauva e fai ma sui o Ausetalia.
E faato‘ā taliu mai Rebecca mai le tauvaga i Samoa ia Setema i le 2011 ona faatoa faia lea o le tauvaga o le Miss Samoa Ausetalia i le tausaga fou. Sa fai ma sui o le Komiti le tofa ia Taefu Patea e faafetaia le auvalaaulia.
