“Afai ae ou mauaina se vaegatupe e fesoasoani ai i ni atinae mo tamaitai talavou Samoa, ou te lagolagoina malosi le faatuina o se polokalame e atinae ai tomai o tamaitai ina ia mafai ona latou maua ni galuega o ni tomai faapitoa, ae lē tau na ona faigaluega…”
[If funding was approved for me to build an initiative for young Samoan women, I would embark on a career-development …It’s important for young women to seek careers and not just seek jobs as we have done traditionally….]
O le tali lea sa tali ai le tamaitai o Penina Maree Pa‘eu, ua faapaleina nei i le Tausala Samoa Niu Sila 2012-2013, ma sa matuā tatagi faaupu a le poto i le faafofoga a le toatele o ē sa auai ma molimauina lea faamoemoe. Sa matuā faatumulia le TelstraClear Pacific Events Centre i Manukau i le afiafi o le Aso Toonai na se‘i mavae atu nei, i le mamalu o le atunuu ma malo faaaloalogia sa auai atu.
Na amataina le polokalame i se tatalo faamanuia sa saunoa i ai le susuga i le faafeagaiga ia Rev. Uesifili Unasa. Na mae‘a lea ona saunoa aloaia ai lea o le susuga i le Faatonu o le Miss Samoa NZ Pageant 2012, le faletua ia Teeva Matāfai, mo le tatalaina o tapenaga o le faamoemoe i lea afiafi.
O le saunoaga foi a le susuga i le Faatonu sa vaaia ai loifofoga maligi a o ia to manatu i le sao tāua o le afioga ia Sala Sally Newsham, o lē sa avea ma faatina o le polokalame a o lei faamanavaina e le Atua ana galuega i le Aso Faraile, a o lumanai le tauvaga i le Aso Toonai na tea nei.
E toa 6 sui tauva o lenei tausaga. O Lette Lesleyann Su‘a Seiuli Saolotoga, lagolagoina e le Ese Tatupu Funeral Directors; Faalagilagi Chan Fualau Tuisalega, lagolagoina e le Five Star Motors; Penina Maree Paeu, lagolagoina e Taulapapa Leata Su‘a Aoga Amata Trust; Alana Tyrell, lagolagoina e le Alignz Recruitment; Hope Tualagi Talataina, lagolagoina e le Tuigamala Family Funerals; ma le tamaitai o June Nive Va‘asilifiti-Ioelu, lagolagoina e le Tuala Family.
E 5 vaega na vaevaeina i ai le tauvaga o lenei foi tausaga. (1) O Laei Faaleaganuu (Traditionally Inspired Wear), (2) Sarong Wear, (3) Taleni, (4) Fesili ma Tali (Interview), (5) Puletasi.
Sa matuā faamalieina foi le maimoaga a le mamalu o le atunuu sa auai e le gata o faafiafiaga a ausiva ma aupepese faapitoa sa valaaulia i lea faamoemoe, ae o le matagofie ma le pa‘i malu mai foi o le saunoaga faamalosiau a le Tausala ua faamutaina lana tautua a o pale mai foi i lea tofi, le tamaitai o Metotisi Komiti Faalavaau.
O le iuga lenei o le tauvaga e pei ona alofaiva i ai tausala Samoa i Niu Sila 2012:
Miss Samoa NZ 2012 : Penina Maree Paeu
Best Traditional Wear : Penina Maree Paeu
Best Sarong : Penina Maree Paeu
Best Interview : Penina Maree Paeu
1st Runner Up : Alana Tyrell
Best Puletasi : Alana Tyrell
Best Talent : Alana Tyrell
2nd Runner Up : Faalagilagi Chan
Fualau Tuisalega
Miss Personality Award : Faalagilagi Chan
Fualau Tuisalega
The People’s Choice Award : Faalagilagi Chan
Fualau Tuisalega
3rd Runner Up : Lette Lesleyann
Su‘a Seiuli Saolotoga
Miss Photogenic Award : Lette Lesleyann
Su‘a Seiuli Saolotoga
4th Runner Up : Hope Tualagi Talataina
5th Runner Up : June Nive Va‘asilifiti-Ioelu
Miss Friendship Award :
June Nive Va‘asilifiti-Ioelu
