Na uigaese le matagofie ma le saunia lelei o tapenaga o le tauvaga e pei ona molimauina i le po anapo. O se faafiafiaga uigaese le faatumulia i le aumaimoa. Na vaaia le fiafia o tagata uma e amata mai lava i nai tamā ma tina matutua e oo atu i tupulaga talavou.
O le lagolago a le atunuu ona o uiga tausaafia o le alo sailimalo o Samoa ia Alex Faatau‘ī Leapai a o alo atu mo le isi ana fusuaga e lē o toe mamao, na mafua ai lenei sailiga seleni.
O Leapai sisters e aofia ai Lepa, Theresa, Azmina, Marina ma Leah Leapai sa faatautaia ma tapenaina le faamoemoe mai le 2 masina ua tuanai, ae o Sonny sa fesoasoani i faamasino i nisi vaega.
O i latou sa tauva i le Lionheart faafafine Pageant 2012, e toafā: 3rd Runner up: Chacha, o le Miss Mexico; 2nd Runner up: Tango Miss Greece; 1st Runner up: Dolche Lavita Ms Cook Island, ma lē ua pale i le uluai tausaga o le Lionheart Faafafine Pageant, o Koko D’Vyne o ia o le Samoa na ia faatinoina tu ma aganuu a Aotearoa i NZ.
Soo se taaloga a Alex Leapai, e maua le avanoa o lē ua faapaleina e malaga ai e molimauina le faagatama. E ono manuia se isi tauvaga auā o le a tuufaasolo le pale i tausaga uma.
O Capri Jackson ma Faasoo Leapai sa faatautaia le po, na pei e taene e ni aitu le aumaimoa i le aga malie, mataalia ma le agavaa o i laua i le faafiafiaina o le aumaimoa. Sa auai foi le tamaitai o Sophia Piliae Leilua Smith, o ia o le Miss Samoa Tourism o loo alala i Ausetalia.
E toatolu faamasino o le tauvaga, o le faletua ia Faanape Tuuga Timoteo, Pricilla ma le afioga ia Toleafoa Ian Asiata. Momoli le agaga faafetai o le susuga ia Alex Leapai ma ona uso faapea si o latou tina ia Leitu Leapai malaga mai Samoa ona o le talileleia e le atunuu o le faamoemoe o le Lionheart Faafafine Pageant 2012.
