Faapaleina Erin Noelani Taefu avea ma Miss Samoa Australia (QLD)

Miss Samoa Australia ua fai ma sui o Kuiniselani mo le tauvaga tele i Samoa Erin Noelani Taefu
Miss Samoa Australia ua fai ma sui o Kuiniselani mo le tauvaga tele i Samoa Erin Noelani Taefu

Na faatumulia le Acacia Ridge Hotel i le po o le Aso Toonai aso 4 o Aokuso, sa lolofi atu ai le mamalu o le auvalaaulia e molimauina le faapaleina o le alo tamaitai lalelei o Samoa i Kuiniselani, le tamaitai o Erin Noelani Taefu e avea ma Miss Samoa Ausetalia e na te tauaveina le igoa o Samoa i Kuiniselani i le tauvaga tele o le a faia i Samoa e sailia ai se lalelei o Samoa.

O le tamaitai o Erin Noelani Taefu, na atoa le 18 o ona tausaga ia Me, na soifua a’e i Aukilani i Niu Sila. Na faa’uina ana a’oa’oga i le Glenala State High School. O se tamaitai loto alofa, agamalu ma tausaafia e le tele o tagata i lana amio tauagafau ma le loto maualalo. E alofa tele o ia e le gata i ona aiga ae faasilisili nai ona mātua.

O lea na tonu ai lava i lona manatu e fia galue ma fesoasoani ona e pele ia te ia nai ona mātua. O loo galue i le Blenners Transport Company (Senior Administration). O nai ona mātua o le tofa ia Patea Pesamino Taefu mai Siufaga Falelatai, Taga Savaii, Fasitootai, Sapunaoa & Lefaga faapea si ona tina ia Maletina Taefu mai Faleula ma Samusu Aleipata.

O lea po tāua na muai amataina i se sauniga lotu tāua sa taitaia e le susuga i le taitai o le ekalesia A.O.G Church of Samoa in Australia, susuga ia Senior Ps Ta’eauga Ropati Frost.

O le fofoga o le po sa faatautaia polokalame uma, o le tamaitai faifeau ia Ps Sitika Lemana-Satui. O le tofa ia Patea Pesamino sa faafeiloaia le auvalaaulia.

O le afioga ia Tauiliili Ata Malifa (Sui o le sui o le komiti, Faatamā Samoa Tuufaatasi Brisbane) o ia sa saunoa i se saunoaga faapitoa o le po. Na saunoa foi le afioga ia Fonoti Koleta Talevu, Faatonu o le Miss Samoa Australia i se ripoti ma se tala e fai ma sui o le komiti. Sa auai Susuga i Faafeagaiga ma Faletua, taitai o mafutaga ma faalapotopotoga faapea le loaloa o le auvalaaulia na mamalu ai ma matagofie lea po tāua.

E tele faafiafiaga na mataina ai le silamaimoa a le auvalaaulia ae sili ai ona sioa ma lologo le aofia i se saunoaga a le tamaitai ia Erin Noelani e tusa ai ma ana tapenaga mo le faamoemoe ua alo atu iai i le faaiuga o le masina nei.

O le toatele o tauaiga malaga mamao mai sa mafuta mai i lea po ona o le fia lagolago i le faamoemoe o le Miss Samoa Ausetalia a Kuiniselani, e le gata o meaalofa ae o seleni e tele na o latou foai na tauaaoina le $20,200.00 ma ona tupu.

Na momoli le agaga faafetai o le komiti i le tali mai a le atunuu ua feauga ma talafeagai lo latou aao foai e faaagaga auā tapenaga a le komiti ma le tamaitai tauva a Kuiniselani mo le tauvaga tele i Samoa.

Na toe saunoa faafetai le tofa ia Patea Taefu e fai ma sui o le komiti i lea po, ae o le fetalaiga i le matua fetalai ia Leapai Vaa II sa fai ma sui o le valaaulia e momoli se agaga faafetai tele ona o le matagofie o tapenaga uma o le po.

Na momoli foi le agaga faafetai tele o le komiti i le faletua ia Noela Lauvao Poleki na ia su’i fuaina uma puletasi ma laei o le tamaitai o Erin Noelani. E le gata i lea o le susuga ia Pr Faamalologa ma le faletua ia Tamara Fuesaina na lolomiina elei.

Nisi foi sa lagolago e pei o le P.O.A. – Reflecting Memories, faapea le susuga i le faafeagaiga ia Fausia ma le faletua ia Joanne na o la foaia ni CD pese e faatauina ma fesoasoani i tapenaga a Noelani, aemaise o tauaiga, uo ma ē masani sa lagolago ma foai i lea po. Ia faamanuia tele le Atua!