Faapaleina Christina Faafili Miss Samoa Niu Sila 2009-2010

O le po o le Aso Toonai 25 Iulai 2009, na faataunuuina ai le faamoemoe o le Miss Samoa Niu Sila i le TelstraClear in Manukau. Na matua faatumulia lea po i le paia ma le mamalu o le atunuu i tupu ma tamalii, sa‘oao ma tamaitai seia oo lava i alo ma fanau o e na latou molimauina lenei faamoemoe taua o le faamanatuina ma le faatauaina o le lalelei o tamaitai Samoa i Niu Sila. Na tatalaina aloaia la le faamoemoe o le Miss Samoa Niu Sila i le lagiina o le vii o le fu‘a o le saolotoga o Samoa e le susuga ia Henry Hunkin, ona sosoo ai lea ma le tatalo na saunia e le susuga i le faifeau o Ionatana Pouli Lefale. O le afioga lava ia Sala Sally Newsham le faatonu o le matagaluega o le Miss Samoa Niu Sila na saunoa e faafeiloai i le paia ma le mamalu o le auvalaaulia ma ave foi lana faafetai i le toatele o le paia ma le mamalu o i latou uma sa togimaa ma fai o latou sao i lenei polokalame taua i tausaga ua mavae seia oo mai lava foi i lenei tausaga. Na saunoa faafetai foi le afioga Sala Sally e faafetaia ai le lagolago malosi mai o le Afioga a le Ao Mamalu o le Malo Samoa ma lana masiofo, le afioga i le sui palemia Misa Telefoni, le afioga Papaliitele Moli Malietoa aemaise sui o le palemane na auai mai le faamoemoe i lea po.
Ia na maoae foi le vaaiga i le matagofie o sauniuniga ma tapenaga na feagai ma kamupani (sponsors) eseese sa latou lagolagoina malosi le tulai mai o nei tamaitai e fai ma o latou sui tauva aua le feagai ai ma le Miss Samoa o lenei tausaga. E toaiva i latou na faatinoina lenei faamoemoe ma o se mafutaga mataina ona o le lalelei o tamaitai sa tauva ma faataunuuina lenei foi polokalame taua o le Miss Samoa Niu Sila. O tamaitai nei sa tauva e aofia ai: Samantha Kumar; Christina Tulipe Faafili; Dinah Fuimaono Asafo; Solema Dolly Aisake Peseta; Kathryn Zombos; Auvasa Nafanua Kamu Wright; Tauaniua Fretton Ioane; Nyah Unasa Laufiso; ma Angelica Line Ng Lam.
E lima vaega sa faaautu i ai le tauvaga o le Miss Samoa e aofia ai le ofu taele matagofie (best swim-wear), laei puletasi matagofie (best puletasi), o le faaaliga taleni (talent award), matagofie o le teuteuga o le laei faa-Samoa (best costume) ia ma le lelei ma atoatoa o le faatalanoaina po o le taliga o le fesili (best interview). Ia e taga eseese lava faaaliga a nai tamaitai aua sa maua tele ai lava le ata ma le fiafia o le aumaimoa. Sa maua foi le avanoa na maimoa ai le mamalu o le valaaulia i le matagofie o faafiafiaga mai nisi foi o alo lava ma fanau Samoa sa faafiafia i lea po. E iai le talitonuga sa faamalieina le maimoaga a le paia ma le mamalu i le valaaulia ma si o tatou atunuu foi i le faagasologa o le polokalame o le po. Na maea le faagasologa o le polokalame ina ua maua le faaiuga o le tauvaga tausala o le po, ona faagasolo loa lea o le vaega mulimuli e pei lava ona masani ai mea nei o tauvaga. E talitonu o se filifiliga sa le faigofie ona faatino ma faigata lona faataunuuina ona e lalelei ma matagofie uma tamaitai sa faataunuuina le tauvaga lenei i lea po. E ui i lea sa faataunuuina lava le galuega fita a le au faamasino ma faasilasila mai ai loa ma faaiuga o le tauvaga. O le toalima muamua na filifilia e aofia ai Kathryn, Auvasa, Unasa, Samantha ma Christina. Soo se tauvaga lava ma ona faaiuga e tatau lava ona iai ma le faaluafesasi aua e eseese uma faaiuga a faamasino taitasi. E ui i lea e iai le talitonuga sa faafiafiaina lagona ma le vaai e tusa ma faaiuga a le au faamasino.
O faaiuga la nei o faailoga faapitoa na mauaina e nisi o tamaitai e aofia ai uiga faaalia (personality) Kathryn Zombos, laufofoga fiafia ma mata ataata (friendship) na mauaina e Dinah Fuimaono Asafo ae maise le faaalia o le mataalia ma le tausaafia na mauaina foi e Kathryn Zombos. O nisi foi o faailoga faapitoa na mafai ona mauaina ma faamanuiaina ai nisi o tamaitai e aofia ai Dinah Fuimaono, Angelica Lina Ng Lam, Solema Dolly Aisake Peseta ma Tauaniua Fretton Ioane. O le faagasologa o tauvaga i vaega faapitoa na manumalo ai Christina Faafili i le matagofie o le laei faa-Samoa, o le ofu taele na manumalo ai le tamaitai o Samantha Kumar, o le faaaliga taleni na manumalo ai le tamaitai o Solema Dolly Aisake Peseta, o le puletasi matagofie na manumalo ai le tamaitai o Nyah Unasa, ma le faatalanoaga poo le fesili na manumalo ai foi le tamaitai o Samantha Kumar.
O le aotelega la ma le faaiuga o le tuvaga Miss Samoa Niu Sila na sola ai le tamaitai o Christina Tulipe Faafili (sponsored by Video A‘au) ma le manumalo o lenei tausaga 2009-2010. O le tamaitai lalelei o Samantha Kumar (sponsored by Kara’s Fashion) sa tulai mai i le tulaga lua, o le tamaitai o Hyah Unasa Laufiso na tulai mai le tulaga tolu, o le tamaitai o Auvasa Nafanua Kamu Wright na tulai mai i le tulaga fa, ma le tamaitai o Kathryn Zombos na tulai mai i le tulaga lima. Ia ona taape foi lea o lenei tumutumu sa auai i le tauvaga Miss Samoa Niu Sila o lenei tausaga ma ni o latou lava lagona ma manatu e tusa ma lea po ma le polokalame ma ona foi faaiuga. O nisi lava sa fiafia ma talia lelei faaiuga a faamasino, ia a o nisi na foi i le fale ma ni lagona le fiafia. Ia o le viiga lava o le Atua e le faaitiitia ona ua maea foi lenei faamoemoe i le manuia ma le faatasi mai o lona mana, na mafai ai ona faataunuuina mea uma ma le manuia.