Ua mae‘a nei ona faaee aloaia le pale o le Miss Samoa Niu Sila 2014 i le 2015 i le tamaitai ia Latafale Auvaa. O le afiafi o le Aso Lulu na faataunuu ai lenei faamoemoe i le faletalimalo o le Holiday Inn i Magele i le itula e 7 i le afiafi.
Na auai ai le afioga i le faipule a Magele ia Su‘a William Sio, faapea foi le tamaitai faipule o le New Zealand First ia Asenati Lole Taylor. Sa faatasi ai foi le Sui konesula o Samoa le afioga ia Fonoti Dr Lafitai faapea aiga o le tamaitai ia Latafale Auvaa.
Na tatala le polokalame i le faatulima a le fofoga o le po le tamaitai ia Yolande Ah Chong, ona sosoo ai lea ma le tatalo na saunia e le afioga i le tamaitai faipule ia Asenati Lole Taylor e amata aloaia ai le faamoemoe.
O le aufaipese a le tamaitai ia Tinei ma Isaiah Junior na tatalaina faafiafiaga ona sosoo ai lea ma le ausiva a le Moana Pacific Dance Group i tamaiti e tailima tausaga agai i luga i le 13 tausaga. Sa faafiafia ai foi le Tatau Dance Crew faapea le Malu Measina Samoa.
O le saunoaga faapitoa o le po na saunoa i ai le Sui konesula o Samoa le afioga ia Fonoti Dr Lafitai, faapea le faipule o Magele ia Su‘a William Sio faatasi ai ma le saunoaga a le faatonu ia Ulalemamae Te‘eva Matafai. Na auga lava saunoaga o le po i le faamalo i le tamaitai ia Margaret Sarona Scott i lona taimi na ia tauaveina mai ai le tofi seia oo ina faamuta lana tautua i le atunuu.
Ae sa momoli ai foi ma le faamalosi ma luitau i le Miss Samoa fou le tamaitai ia Latafale Auvaa i lona tulai mai i le tauaveina o le pale o le Miss Samoa 2014 – 2015. O le Tausala Samoa 2013 – 2014 le tamaitai ia Margaret Sarona Scott na ia faafetaia le mamalu o le atunuu faapea le faatonu o lenei polokalame i le lagolago i lona taimi a o tulai mai i le tofi. Na faaiu polokalame o le afiafi i faafiafiaga ma sausaunoaga a Margaret Scott ma le tamaitai ia Latafale Auvaa.
O le tamaitai ia Latafale, o le uii lea o le fanau ma o le lona lua ai lea o alo o Auvaa ua mafai ona tauva i le Miss Samoa. O lona uso matua ia Sara Jane lea foi sa tauva muamua ai. Ae na faaalia se finagalo o le tamā ia Unasa Auvaa Enosa, o lana fanau la te faamalosia lava i soo se mea e iai se Samoa poo se tauvaga e maua ai se mafutaga poo soo se mea e ta‘u atu ai Samoa ia ta‘ua ia i latou.
O le tauvaga o le tausala Samoa e tāua ia i laua mātua e maua ai le sootaga a le fanau ma Samoa, e faamalosia ai o ia o le Samoa, e iloa ai nisi mea i teine o le Pasefika ma maua ai foi le avanoa e asiasi ai i aiga i Samoa. O le mafuaga lena la te faamalosia ai le la fanau i tauvaga tausala a le atunuu.
Ae na ta‘ua foi e le tamā, o le tapenaga a Latafale i le Tausala a Samoa ua leva ona sauni i ai ma o le latou galuega fai faatasi foi ma lona afafine, auā e faalua ona la pasiaina le apalai a Latafale a o lei tuuina i luga o le internet e pei ona faataunuuina ai le filifiliga o se tausala a Samoa. O se tamaitai e fiafia i mea tau siva ma tauvaga faapenei i totonu o aoga.
O le olaga aoaoina o Latafale Auvaa, na aoga i le aoga i Papakura, ona sau lea i le aoga a St Albert i Aukilani, ona sosoo ai lea ma le aoga a Kings College ma maua ai lana sikolasipi i le Iunivesite a Aukilani i le 3 tausaga.
I le taimi lava lena na valaau mai ai le Iunivesite a Otago o loo maua lana sikolasipi i le Law and Music i le 5 tausaga. O le taimi nei o loo tausaga 3 Latafale i le Iunivesite a Otago, ma o loo fai foi ma sui o Niu Sila i aufaipese a le lalolagi.
O se tamaitai e fiafia i lotu ma mea e fai o aiga, ma e tupuga mai foi i se aiga na galulue faafaifeau i le Ekalesia Metotisi. O lona tamā o Unasa Auvaa Enosa Auvaa mai Tiavea, Saleaumua, Satupaitea ma Siufaga ma lona tina o Felicity Auvaa, o ni mātua o loo galulue foi i ni galuega maualuluga a le malo o Niu Sila.
