Laga ia le vaa o manū ae fulifaō pea le vaa o mala auā o lele ua to i tua Apolima ae ‘ava mua ia i le Atua, e pei o le igoa ipu o Nafanua auā ua a‘e foi le ti‘a malō sa faalele i le vateatea ae faaifo i le tuamafa filimalae le lupe a le Malietoa ina ua to manuia, ua taunuu le faamoemoe o le susuga i le Toeaina ia Rev Tauaana ma le faletua ia Senerita ma le paia o le ekalesia EFKS a Southwest. Ua faasuafaina le mauga o le Atua i le “Puna ole Olataga”, ma le hall o le “Tiafau Hall”.
E faitau afe tagata sa auai e pei o le aufaigaluega a le Atua ma i latou uma sa paau mamao mai i vasa e fia ona o le molimauina o le faamoemoe o le susuga i le Toeaina o le pulega, faletua ma le ekalesia. Ua taunuu ai le muagagana a le atunuu, Ua sasaa mai punāvai o le manuia o le Atua mo ona tagata tapuai.
E ui i se malulu o le taeao manino ma le toto‘a o le Aso Faraile a o suluia e ave malolosi o le la laufanua lafulemu o Kuiniselani, ae na faatumulia lava le fanua o le ekalesia. Na tatalaina i taalolo e ova atu i le 20, e tusa ai foi ma tu ma agaifanua a le atunuu i aso faapenei.
O le lupe see mai e ala i le alolofa foai ma le aao mafola ona o le galuega a le Atua sa faatinoina e le tele o ekalesia EFKS o le Matagaluega, ma isi fata faitaulaga, afioaga ma aiga. O lea afiafi na alofaiva atu ai le faafeagaiga ma le aulotu mo a latou ipu ma na molimauina e ta‘i $5,000 na amataina ai ipu a matafale, ma le toatele o le au fesoasoani na ofoina a latou taulaga.
O le taeao o le Aso Toonai, (7/8/2010) sa tatala aloaia ai le faapaiaina o le Ala ma le mila o le malumalu tapuai ma le hall i le ootiina o le lipine e le faletua ia Tailua Roma (faletua o le Taitai aoao a le ekalesia ia Rev Tavita Roma) o loo galulue i Salailua i Savaii.
O le tau aofai o le galuega e tusa ma le $1,250,000. Na amataina le falesa i le aso 3 o Fepuari 2010, ua mae‘a ona mautu le fanua sa tagi lava i aao o le ekalesia. E tusa ai ma le aao foai o Samoa na potopoto, sa tauaaoina ai se seleni paia i Taalolo – $42,100; Po Siva – $304,259.20; Meaalofa – $169,020. O lona aofaiga e $515,379.20.
O se tala faasolopito foi lea i le matagaluega EFKS i Brisbane ma isi foi fata faitaulaga i le tulai mai o lenei faamoemoe ona ua faasolo ina mamā le aitalafu o loo totoe ina ua mae‘a pe ā ma le $284,620.80 pe a faatusa i le na o le $800,000 sa manaomia.
Ua 14 nei tausaga o galulue le susuga i le Toeaina ma le aulotu a Southwest. Mo le silafia, o le toeaina ia Rev Tauaana o le lupe faalele a le afioaga o Lufilufi ma Salesatele faapea le faletua ia Senerita o le lupe faalele a le Aiga Tauaana mai Falelatai, Vini Fou ma Vaiee i Safata.
Sa taitaia le sauniga e le susuga i le Toeaina Faatonu ia Kerita Reupena, faitauina o le Tusi Paia, o le failautusi o le pulega, le susuga ia Rev Petaia Tuifao, ma le upu autū o le aso, o le susuga i le Taitaifono o le EFKS mai Samoa, Rev Tavita Roma.
Na taitaia le faamanatuga e le susuga i le Toeaina ia Rev Lauie Lupematasila. O mātua malolo manumalo a le ekalesia EFKS Southwest o le susuga ia Samuelu ma le faletua ia Tima Tu‘iai.
Matagofie le togiga a le aufaipese a le ekalesia sa peseina viiga, ma le fofoga taumafa manogi sa tapenaina e le Uncle Sam’s Catering.
Ua iai le faamoemoe e toe taliu atu le aufaigaluega ma ē sa malaga mai i se aso o lenei masina. Faamanuia tele le Atua i lau susuga le toeaina Rev Tauaana ma le faletua ia Senerita Mataafa faapea le ekalesia a Southwest.
