Poo ā ni fita tatou te fetaiai, ae a mauaa le faatuatua, e faafaigofieina e le Atua ni auala e faatino ai.
E faapena foi ona ia faatasi i soo se nofoaga e potopoto ai ana auauna, ona o lona suafa, pe toalua pe toatolu, pe faatauvaa pe matagofie se malumalu e faia ai sauniga, e lē popole i ai, ona e sili atu ona tāua lou loto fuatiaifo ma lou mulimulitai ona o lona finagalo, nai lo le vaaiga faaletagata.
Ou te manatu e faapea foi le Ekalesia fou a le Assembly of God i Parramatta, lea na faapaiaina i le Aso Sa.
E ui ina itiiti i latou na faatinoina lea faamoemoe, ae ua mautu ma tino mai miti na tepa taulai i ai le Ekalesia aoao, auā ni agaga taase o loo fia maua se fesoasoani i lena vaipanoa.
O le a taitaia le galuega e Pastor Tafeamaalii Fesola‘i Uta‘i ma le faletua tausaafia ia Apulu Lesina, aemaise foi le lagolagosua a le nofoaalo, i tamaitai lalelei e toalima ma o latou alii, o tama e toalua ma o la faletua, fanau a fanau e to‘a sefuluono, ae lē faagaloina le aiga potopoto ma le Ekalesia fou.
O se tasi o alo e faasino tonu i le susuga i le faafeagaiga ma le faletua ,o Matthew Uta‘i, e ui ina faatauvaa lona tino, ae ua tauleleia ai Samoa i lana tautua matavela i le lakapi liki e pei ona loa tausaga i le Bulldogs ma le ‘au a le West Tigers lea o loo iai i le taimi nei.
O le susuga i le faafeagaiga ma le faletua, e sefululua tausaga na afusisina ai i le tau asuina o le vai ole ola i le aai tele o Carol Park i Brisbane, ae lei siitia mai i Parramatta.
O le Aso Sa i le itula e iva i le taeao, na amata ai le sauniga o le faatuina poo le faapaiaina o lenei Ekalesia fou.
Na masii mai le paia lasilasi o faafeagaiga ma o latou faletua, mai Sydney, Brisbane ma Melbourne.
Na faatautaia le sauniga e le aao tusitusi poo le failautusi, Pastor Taeauga Ropati Frost mai Brisbane, ma o ia foi na folafolaina le afioga paia a le Atua. Faapaiaina o le galuega, afioga i le Taiulu Pastor Lagofaatasi Sapa‘u Polutele mai Mt Druitt, faamanatuga saunia e Pastor Lega Mataia Ropati Frost.
O le lauga matagofie na nafa lea ma le Sui Taiulu, le susuga ia Pastor Apouani Unasa mai Melbourne.
“Fausiaina o le maota o le Atua, e tuu ai lana ato laau o le feagaiga. Ia fausia faalelei le Ekalesia, ina ia afio ai Keriso.” O le matua o le lauga mai le 1 Nofoaiga a Tupu, mataupu e 17, fuaiupu 1.
Na mae‘a le sauniga o le faapaiaina o le faafeagaiga ma le Ekalesia fou, ona alo atu lea i le taliina o le sua poo le taumafataga tele na saunia lava e le aiga Sa Tafeamaalii, ma le nofoaalo, lea na gaseseina e le afioga i le alii Master Chef, o Uoka Taveuveu ma lana manamea laufofoga fiafia o Lisa.
E faapei o le saunoaga a Pastor Apouani Unasa, ia fausia le Ekalesia ina ia lelei, atonu o lea ua amata mai lava i le laufofoga fiafia o alo o le faafeagaiga i lea aso, ona e tusa poo le ā le tele ma le felanulanuai o ni taumafa, ae a faauu i latou e nafa ma le faasoasoaina, e lē manogi foi pe faaosofia so ta fia ai.
Ae faafetai ona e lē gata i le matagofie o le teuina o le hall, ae o le aulelei o i latou na saunia lea itu i o latou laei o puletasi ma ie faitaga o le Samoa moni.
O le afioga i le fofoga o le aso, Taotasi Tuigamala, na avea ma fofoga taumomoli o le aiga, auā le galuega ua tino mai. Ua sausau fia lele le manu nai utufiu ona ua faagaeetia, i le matagofie o le aso.
Pei ona ia ta‘ua, e lē totogiina le galuega a le Atua, ae pagā ona o manava o maile ua fia maua se manuia. Ia agalega faatasi auā e lē faigofie le faamoemoe. Se‘i pola puipui le aiga auā le galuega a le faafeagaiga poo la latou taulaga ona o le Atua ma lona suafa.
O le a amatalia sauniga a le Ekalesia fou Assembly of God Parramatta, i le Aso Sa poo Aso Sa taitasi, i le hall a le Private School, i Centenary Rd, Merrylands itula e iva i le taeao.
Mo nisi faamatalaga auiliili, faafesootai Lesina i le telefoni feaveai: 0424 531 408. O loo maua le avanoa mo oe, i le Maota o le Atua.
Momoli le faamalo i le komiti faafoe, lau afioga i le Taiulu Pastor Lagofaatasi Sapa‘u Polutele, Sui Taiulu Pastor Apuoani Unasa, Aao Tusitusi Pastor Taeauga Ropati Frost, Teuoloa, Pastor Faitoaga Soloi. Aemaise le faafeagaiga ma le faletua ona e lē faigofie le ala i le manuia.
