O le finagalo lava lea o le Atua ina ia tuufaatasia lana fanau e ala i le sakalameta o le faaipoipoga.
E tiga foi le vavamamao o tauaiga peitai tasi lenei o faamoemoe e ono toe maua ai ni feiloaiga vavave a aiga ua leva ona valavala, ona o le osiaiga ma le manatu i alo ma fanau.
A o susulu manaia le la leai se ao e fegasoloa‘i i le ta o le 10 i le taeao o le Aso Toonai, 30 o Iulai, na osia ai se feagaiga mamalu e faavae ai le aiga fou o le alii mai Tonga o Halapaini Fonua ma lana manamea o Lafoai Sa‘u Lale i le Ekalesia Samoan Uniting Church i Sunnybank.
Sa taitaia lea sauniga e le susuga i le faafeagaiga ia Rev Andrew Ross a o molimauina e le toatele o aiga ma uo e lē gata o Ausetalia nei ae faapea foi ē na malaga mai Niu Sila, Samoa ma Amerika.
E to‘a 5 le laina o uo sili ma aumea mamae e aofia ai flower girls e 5 ma page boys e to‘a 5 foi. Ua tausaga ma le ‘afa talu ona masani le isi i uiga o le isi.
O le tamaitai o Lafoai o ia sa auai ile sailiga o se Miss Samoa Ausetalia i ni tausaga ua tuanai ma e tasi lea o tamaitai sa lei faigofie i le maitau a faamasino ona o le agavaa ma le onomea.
E lē gata i lea sa auai foi i le tauvaga a le Miss Poly Art i Brisbane talu ai ae lei amataina mai le Miss Samoa Ausetalia. Na auai foi le Faatonu o le Miss Samoa Ausetalia faapea nisi o le Komiti sa avea ma malo faaaloalogia i le aso tele o Lafoai ma Halapaini.
Na matuai sioa le faalapotopotoga i le feoai o tamatamailima i le taina o le piano, le susuga ia Taaitiiti Tanielu Pula mai Sini o ia sa feagai ma le taina o viiga logomalie o le Atua, o se alo o le faafeagaiga ia Sione Eli ma le faletua ia Apoua o le Uniting Church i Niu Sa Uelese. E alofagia tele lea talavou e ona matua, le aiga ma tagata lautele ona o ona uiga tausaafia ma le alofa.
O ia foi o le taitai o Aoga Aso Sa a Samoa ma Papalagi a le Ekalesia Samoan Uniting Church i Brisbane. O le tamaitai o Lafoai o ona tuaa o si ona tina ia Fofoga mai Vaiusu ma si ona tamā le susuga ia Sa‘u Lemana Faalafi Lale mai Safune ma Apolima.
O le tuagane o le tamaitai faaipoipo ia Lafoai, le afioga ia Tagaloa Jerry Sa‘u Lale sa fai ma fofoga o le aso.
Sa tasi moemoe aiga na lua i le tofa ia Faalafitele Fatiaau Tipa Lale Lemana e tu i le tootoo auā le paia i le auvalaaulia sa aofia atu i lea aso.
Na fai ma sui o malo faaaloalogia le tofa ia Asiata Sivanila e molimolia se agaga faafetai i le maualuluga o faaaloaloga.
O upu masani lava a le atunuu, na tofu le gogo ma si ana i‘a auā na lei alo tamala aiganalua ia latou tapenaga uma, e oo lava i le taumafataga, teutusi ma le tele o palapala a malo.
Faamanuia le Atua i le aiga fou.
