O le malaga mai o le afioga ia Patele Mauga Penitito, Patele Spa Silva ma le afioga i le tiakono ia Ioane Levi mai Samoa e faafoe le semina i Kuiniselani, o se faamanuiaga lea i le Puleaga Katoliko atoa.
O se faamoemoe na molimauina le faatumulia i Matagaluega a Saute ma Matu.
O le faagasolo ai o lenei semina o le faapupulaina atili o nisi o vaega i totonu lava o le Ekalesia, e pei ona talosagaina ai e le Puleaga a Kuiniselani ma malaga mai ai le aumalaga.
E tumau lava faavae o le lotu, peitai ua tele suiga fou ma vaega tāua ua iai nei e pei o le Divine Mercy, o le toe faafouga o le Eukalesitia, Autau a Maria, Aulau Losalio ma nisi faalapotopotoga, o aano o le lotoifale o le Ekalesia faapea matafaioi ma tiute tauave. O nisi na o vaega sa faamamafaina i le semina i le Aso Toonai, aso 26 o Fepuari.
Sa maua ai avanoa faaauro na fesiligia ai e le toatele i le fia malamalama atili i nisi o vaega o faanunumi ai le auaunaga ma le ola auauna i totonu o le galuega a le Atua, ma na manino ma faamalieina atoatoa finagalo i saunoaga na tali atu ai le afioga ia Patele Mauga Penitito.
O le tāua o lenei semina ona sa taitaia e lana afioga faapea le aumalaga. O Patele Mauga Penitito (Mulivai Safata) o ia o le Sui Akiepikopō a Samoa.
O se tasi lea ana matātā, o le faia o semina ma o loo ia tausia foi le Matagaluega Katoliko a Lefaga.
O le afioga ia Patele Spa Silva o Faleula, o ia o le sui failautusi a le Akiepikopō o le Puleaga a Samoa, sa fai sao foi i le semina.
O le afioga i le tiakono ia Ioane Levi mai Fasitoo-tai sa auai mai foi e lagolagosua auā le faatalauula atu a le Puleaga Katoliko a Kuiniselani.
Na tele vaega tāua sa oo i ai saunoaga a Patele ma le aumalaga sa faafiafiaina ai le toatele, ma e leai se isi na manao e vave uma ona o le mālie foi ma le agavaa o taitai faapea le tomai ma le gagana faafaigofie sa faaaogāina na avea ma ala na manino ai mataupu uma o le semina.
E iai le talitonuga na tofatumoanaina ia a‘oa‘oga tāua i loto ma agaga o le Puleaga Katoliko a Kuiniselani, ma o se ‘ai lelei lea mo le agaigai i luma o le soifua auauna o tagata.
E faamoemoe o le vaiaso nei o le a malaga atu ai Patele ma Patele ma le Tiakono i le aai o Niu Sa Uelese e pei ona tālia mai e le Ekalesia Katoliko i lena foi setete.
