O le Aso Sa ua tea sa faapaia ai tofi fou o le Ekalesia Katoliko Samoa i Aukilani i se sauniga lotu sa faia i Malaeola. O le afioga i le Epikopo o Aukilani Patrick Dunn sa nafa ma le faapaiaina o tofi fou a Malaeola, ae lagolagosua i ai le tamā faaleagaga o Malaeola, le afioga ia Patele Mikaele Alipia Endemann ma le afioga Mosiniolo Lui Tevaga.
Na faatumulia le sauniga lotu i sui auai o palisi Samoa e 25 mai Aukilani aoao, faapea foi aiga, uo ma ē sa auai i lea sauniga e lagolago ma molimauina le suiga o tofi mo le tausaga 2014 i Malaeola.
O le afioga ia Maiava Afemua Seve Felise Lafaele ua avea nei ma Peresetene poo le Taitaifono Aoao, a o le afioga ia Maiava Setefano ua avea ma Sui Peresetene poo le Sui Taitaifono. O le afioga Taupau Petelo ua avea ma Failautusi Aoao, a o le Tofa ia Tamala Vitale o loo tumau pea ma Teutupe a le Ekalesia Katoliko Samoa Aoao i Aukilani.
E lē gata i suiga tofi aoao e pei ona ta‘ua i luga, ae sa faapea foi ona faapaia faatasi ma peresetene e 25 o palisi Samoa ma latou laulauafono i lea sauniga paia.
Faatoa toe sui lea o tofiga uma o Malaeola talu mai le tuumalo o le afioga Tofaeono Tanuvasa Tavale i le tausaga ua mavae.
E momoli atu faamanuiaga ia i latou uma ua umia tofi o le Ekalesia Katoliko Samoa i Malaeola. E tāua tele nei tofi. E lē faigofie. Ae e pei ona saunoa le afioga Patele Mikaele Endemann ma le afioga Epikopo Patrick Dunn, ia faatino tofi ma le faamaoni, ma le alofa, faapea ma le faatuatua.
E leai foi se eseesega o tofi o le Ekalesia ma le faatinoga o tofi o faigamalo. E tāua le faamaoni, e tāua le alofa i tagata, e tāua le amoitonu. E pei lava ona galue tofi o ekalesia mo le manuia o le aulotu, e faapena foi ona galue tofi o faigamalo ina ia manuia uma tagata uma.
E tāua foi le tiute tauave a latou e lagolagosua i nei tofi fou. E ao ona tapega ni fautuaga lelei ia i latou ua avea ma taitai. Afai lava e iai ni faaiuga e sese, e ao ona faailoa i ai ia latou ua avea ma taitai.
E tutusa foi ma tofi o le faigamalo. E lē tatau ona tatou gūgū pe afai o loo iai faaletonu i o latou faaiuga, e ao lava ona tatou laga nei faaletonu, ma momoli atu i ai ni fautuaga lelei. E tāua lea vaaiga auā o le tausaga lenei o faigapalota faalauaitele a Niu Sila.
O le tausaga lenei o le 2014 o le tausaga o le faigapalota faalauaitele i ē toe fai ai le filifiliga a le atunuu poo ai e tatau ona tu mai i le foe o le faigamalo.
Ua atoa nei le 6 tausaga talu ona tulai mai le faigamalo a John Key ma lana vaega faaupufai a le National.
I le amataga sa toatele tagata Niu Sila sa fiafia i le tamaloa talu ai le talaaga o lona soifua o ia o se tagata na soifua mai o mativa, ae mulimuli ane ua avea ma milionea. Fai mai le talaaga na amata mai lona soifua o nofo i fale a le Malo, ae ina ua iu mai le univesete, ma mulimuli ane ua avea ma tagata lauiloa i le faatauina o tupe i le maketi faavaomalo o tupe (international money exchange).
Talu ai lona tomai i lea galuega, sa maua ai lana faaputugatupe e silia ma le $50 miliona. Fai mai le toatele o tagata e lelei tele le avea o le alii ma Palemia auā o loo iai lona poto masani i mataupu tau tupe ma mataupu tau pisinisi.
Peitai ane, o lea ua tatou iloa nei o lana faiga pisinisi e faa‘au‘au ia i latou ua avea ma uo mamae ia te ia. Manatua foi le feagaiga lea na osia i le va o lana faigamalo ma le kamupani o le Sky City Casino. O lea feagaiga e manuia ai lava le kamupani ma latou o loo auai i le pulega o lea kamupani.
O le isi e lē o ni tamai tupe lea latou te maua i le feagaiga ua latou osia ma lea kamupani.
Fai mai foi le toatele o tagata Niu Sila sa fiafia tele ia Key ona o se tagata e lelei tele ana faamatalaga ma tali i fesili. Peitai ane, ua aliali mai foi nisi ona uiga e lelei foi ma vave lana ‘alo i fesili i mataupu faigata.
E vave le aloese pe a fesiligia i ana polomisi poo folafolaga ua lē taunuu. Manatua foi lana folafolaga e lē siitia le lafoga o le GST e lana faigamalo, ae mulimuli ane ua siitia mai le 12.5% i le 15%. Manatua foi lana polomisi o le a saili ia maua le 170,000 o galuega fou?
Fai mai foi nisi e malosi le tamaloa ma e lelei le va o ia ma isi taitai o atunuu o le lalolagi. Peitai ane, ua aliali mai foi e lē fia faalogo le tamaloa i finagalo faaalia a le Atunuu. Manatua foi le sainiga lima e silia ma le 300,000 o tagata Niu Sila na sainia se talosaga ina ia taofi le faatauina o aseta (Stop Asset Sales petition).
E lei kea i ai le tamaloa i le toatele o tagata na sainia lea talosaga. E ui foi e toatele tagata sa auai i solo tetee ina ua sui le tulafono o le GCSB (e faataga ai le sipai o le Malo i tagata lautele), e leai foi se kea o le tamaloa i ia solo tetee.
O le tausaga lenei e tāua ai le silasila mamao poo fea lea e agai i ai galuega a le faigamalo. Afai ua iai faaletonu. E faigofie le fofo. O loo ia i tatou uma le avanoa ma le saolotoga e fai i ai se faiga faatatau – o le aveese lea mai tofi o faigamalo.
