O le mea moni lava ua tele le suiga o le vaaiga i le itu lea o le taulaga o Apia, i Mulivai, i le taatia mai o le malumalu o le Katoliko Roma, le Maria Imakulata.
Ua silia i le mita ua siitia ai le maualuga o le faavae mai i le maualuga lea sa iai muamua ona faatoa ea ane loa lea o le galuega tele lenei. E maoae lona tulai mai ma o le maualuga ua atili ai le mautu o lona taatia mai i le ogatotonu o le taulaga i lea itu o Apia. Ua iai sina eseesega o le fausaga lenei mai i le ata muamua, ma e maeu foi le matagofie o lea fausaga e pei ona fitaituga ai le matuaofaiva ma le aiga sa le malama. O le afioga lava i le Patele o loo nafa ma sauniga i le malumalu lenei, le afioga Ricky Bernard lea na taitaia le galuega lenei ma o ia foi le matuaofaiva, le matai tufuga o lenei galuega tele.
O le tausaga e 2011 lea na amata ona tala ai i lalo le malumalu lenei i le finagalo o le ekalesia e lē o toe saogalemu le malumalu sa iai ona o le mafuie o le tsunami o le 2009 lea na vaaia ai le taei o le sima o le malumalu tuai sa iai ma e lē o toe saogalemu i le mamalu e asiasia lenei nofoaga, aemaise foi le mamalu o matagaluega eseese e faatautaia ai a latou sauniga i lea nofoaga i aso uma.
E lē o se galuega sa faigofie lona fausaga ae manatua foi o le Maria Imakulata, o le ituaiga malumalu lea e ta‘ua i le gagana Peretania o le Cathedral, o lona uiga e lē o se malumalu e na o le tasi se aulotu e ana, o se malumalu e ui ina faaaogā e i latou o loo i le talafatai o le taulaga, ae o le malumalu ua faapea ona ta‘u o le malumalu o le ekalesia aoao. O le faatinoga foi la o le galuega na sao tupe uma ai lava i latou i totonu o le ekalesia poo le puleaga Samoa atoa, ma e aofia ai ma lala o le ekalesia Katoliko Roma i Samoa faapea ai ona lala i atunuu mamao, ma o vaaiga o le aso na umusa ai, sa matuā lē ofi le malumalu fou i sui o le ekalesia i Samoa nei aemaise i latou mai i Niu Sila ma Ausetalia faapea Amerika Samoa. O le tino atoa o lenei malumalu, o le molimau lea i le toatele o tagata na o latou pulupululima faatasi ina ia tino mai lenei galuega, o faamalamalama tioata teuteuina ua soo atoa ai le taamilosga o le malumalu.
O totonu e tele le galuega ua tino mai ai ni galuega vane o le laupapa o loo siomia ai le pito i luga o le malumalu ae ua aofia ai ma le tioata i le ogatotonu i luga o le malumalu o ata ua foliga mai ai nisi o malumalu lauiloa o le Katoliko i atunuu o Europa.
E lei iai se tala o le tupe o le galuega na tolaulauina i le sauniga e faaulufale ai le malumalu i le Aso Toonai, ae o le faamatalaga a sui o le komiti o lenei galuega e oo atu i le $13 miliona tala ma o le afioga i le masiofo ia Filifilia Tamasese na ia tatala aloaia lenei galuega. O le faafetai a le afioga i le sui o le Vatikana o Akiepikopo Martin Krebs na taitaia le sauniga e aloaia ai le tatalaga o lenei malumalu. O le sauniga lotu muamua na faatautaia i lea nofoaga i lenei vaiaso, o le Lotu o le Sisigafu‘a lea na faatautaia e le Fono Aoao a Ekalesia Soofaatasi i Samoa, e pei ona taitaia e le susuga Kasiano Leaupepe le taitaifono.