“Le Atua e, o le foafoaga, matou te faailoa lou lava alofa ma lou aao ta‘ita‘iina mai o i matou, ua matou faataunuuina ai lenei faamoemoe tāua ma oe ina ua mae‘a la matou galuega.
Afio maia tatou te mafuta ma oe, e te faapaiaina ai lenei malumalu ua mae‘a ona fausia mo le faatinoga o lo matou ola tapuai, faatasi ai ma o matou tagata galulue ua ofoina atu mo oe i soo se feau ma soo se galuega e te finagalo i ai mo lau Afio ma lou malo.”
O viiga na ma le faaneetaga na matuā faamaualugaina mo le Atua e le paia o le aiga faafeagaiga aemaise lava o tagata lolotu uma o matafale taitasi o le aulotu, ae sili foi le lagolago malosi a aiga ma uo ma i latou uma na tofusao i le faavaeina ma le faataunuuina lelei o lenei galuega matagofie.
Na faavaeina ma fausia le malumalu tapuai muamua o le aulotu a St Pauls Samoan Parish i le tausaga 1978, ma e tusa ma le 32 tausaga sa faaaogā ai le malumalu lea seia oo mai ina ua mae‘a nei ma faapaiaina lo latou malumalu fou ua iai nei.
E oo mai i le tausaga 2004 ua tele ni vaega o le malumalu ua faaleagaina aemaise lava o le tulaga lē manuia i aso timuga ona o le faafitauli lea sa sili ona ogaoga i taimi o tapuaiga, ma sa manatu ai loa ua tatau ona faia ni galuega mo le faaleleia atili o le malumalu.
E lima tausaga sa faavaeina ai le faamoemoe (long term plan) lenei seia oo ina ua faataunuuina nei.
E lei faigofie tapenapenaga ma le faagasologa o tauiviga o lenei galuega auā sa fetaiai foi ma faafituli, e lē gata i matagaluega mo le faataunuuina o vaega tatau (legal requirements), ae faapena foi le tau faavasegaina ma le finauina o mea silisili ina ia aua ne‘i iai ni faaletonu i vaega uma mo le faataunuuina o le galuega.
Na mae‘a fuafuaga faataatitia uma ona tonu loa lea i finagalo o le susuga i le faafeagaiga ma le aulotu o le a faatino le fausiaina o le malumalu ia Setema 2009 peitai o le tuai ona maua mai o le faamaoniga mai le Council (Resource & Building Consent) na lē mafai ai ona amataina le galuega e pei ona sa fuafuaina.
Peitai o le agaga faafetai ma le loto fiafia auā o lea ua tino mai mea uma ma le manuia. Soo se faamoemoe lava e faavaeina, fausia ma faagasolo lona faataunuuina, e lē ‘asa lava ma ni faafitauli ma faigata e toetoe lava a faavaivai ai nisi.
E tauau ai foi ina faamavae nisi ia poo le fai foi ma avega mamafa i nisi i le lē galulue faatasi, peitai o liutau nei e mafai ona faamalosia atili ai tagata lolotu ua atoatoa lo latou talitonu ma le faamoemoe ola i le Atua ma lona alofa e ta‘ita‘iina ma faataunuuina ai soo se mea faigata o le soifuaga.
Lea la ua fua mai le alofa tunoa o le Atua ua lē gata ina mae‘a ma faapaiaina le galuega a le aulotu ae ua molimauina le faatupulaia o tagata lolotu ma le fuainumera o matafale ua faaopoopo.
Mai le 2004 na faavaeina ai faaiuga mo le fausiaina o le malumalu, e 20 matafale sa iai o le aulotu, ma sa faaopoopoina mai pea lea fuainumera ma oo atu ai i le 29 i le 2006, seia oo mai i le 2008 ua 41 matafale.
Peita’i e 6 ni aiga sa faamavae ma agai atu i nisi atunuu mo a latou lava fuafuaga i le faaiuga o le tausaga, ma e oo mai la i le taimi nei lea ua tu mai le malumalu o lea ua 45 matafale galulue o le aulotu. O le viiga sili lea o le Atua.
E $750,000 le tau atoa o le galuega ma e molimauina sa galulue ponouai lava ma tagi i lima tagata lolotu uma o matafale taitasi i soo se auala na mafai ona faatino ai le sailiga o seleni auā lenei faamoemoe.
E pei lava o le upu masani a si o tatou atunuu, “O le faamoemoe ua taunuu o le laau o le soifua lea” a o le molimau a le Tusi Paia, “A mae‘a ona tatou faia o se mea ua lelei ma matagofie ona tatou faapea ane lea, o i tatou lava o ni auauna lē aogā ae ia maualuga pea le viiga ma le faaneetaga o le Atua”.
Ia o se faamoemoe matagofie ma le toafilemu lona faataunuuina auā sa maitauina le fofoga fiafia ma le mataalia o le faatinoga i tulaga uma e lē gata i le susuga i le faafeagaiga ma lona faletua (Faiva & Luafaletele Alaelua), a o le mamalu ma le paia o le aulotu i ona vaega uma.
