“Ua faia mea sili mo le Atua”
Ua moni le upu a le tusi, E leai se mea e faigata i le Atua.
Atonu o se tasi lea o fuaitau o le Tusi Paia na agai iai le tele o finagalo o le au valaaulia i le faamoemoe o le Ekalesia Faapotopotoga a Iesu i Magele i le aso Toonai na tea nei.
Na molimauina ai e sulu o le tino le galuega tele sa gapatia ai le susuga i le toeaina o le Matagaluega a Aukilani o le faafeagaiga foi lea o le ekalesia i Magele, susuga Mose Tuisaula mai le faaiuga o Mati o le tausaga na tea nei.
O le galuega e aofia ai le malumalu ma le maota (hall) fou o le ekalesia ua fausia lava i lona fanua i Magele i tua tonu o le taulaga faatau.
E lei natia le agaga fia faafetai o le susuga i le toeaina Mose Tuisaula ma le ekalesia i le lagolagosua e le gata i susuga i faafeagaiga ma ekalesia na auai ai i le sauniga ae faapea foi le nofo tatalo o le ekalesia aoao i soo se atunuu faapea foi aiga, uo ma e masani ina ua taunuu manuia le faamoemoe ma faaiuina le galuega i le alofa ma le agalelei o le Atua.
O le fofoga o le ekalesia , o le aao tusitusi foi , Luaitalo Palelei sa fofogaina le tala o le galuega.
Saunoa Luaitalo o le tau atoa o le galuega ina ua faamaeaina e tasi le miliona ono selau afe tala Niu Sila (1,600,000NZD) ae o le fanua o le ekalesia o loo fausia ai le galuega e tasi ma le tolu kuata eka.
I le saunoaga a Luaitalo na ia faafetaia ai le galulue le faalogologotiga o le susuga i le faafeagaiga ma le faletua ma faafetaia ai foi lo la soifua galulue ma le lagolago i mea lelei aua le galuega a le Atua.
O le satauro o loo i luma maota o le malumalu, na faailoa i le tala o le galuega sa galueaina lava e se tasi o sui o le ekalesia, Lalaga Siliato Peteru ma e lei faagaloina foi le tautua ma le pitolaau sa galueaina e nisi o tama ma tina aemaise sui o le ekalesia ua fai i lagi le folauga.
E iai faafitauli sa feagai ai ao faagasolo le galuega, o se tasi o mataupu e aofia ai le council na mafua ai ona saili fesoasoani le ekalesia i Magele i le faipule o le itumalo le susuga Su’a William Sio.
“Mea lelei o le sulu atu mo se fesoasoani ao loo iai le Samoa moni”, o upu ia na faamatala e Luaitalo i le potopotoga e tusa o le mataupu lea ma le fesoasoani a le alii faipule, o se faamama avega tele lea i le ekalesia.
“O oe ma a’u e atoa ai le foa’i mo le Atua”.
O le susuga i le taitaifono o le ekalesia aoao i Samoa ma atunuu i fafo, susuga Fiti Aloalii na auvasa mamao mai e tali le valaau a le ekalesia e ala i le galuega, ma o le taitai foi lea o le sauniga.
E tolu ni vaega taua sa au au iai le lauga , muamua e ao ona iai se agaga naunau (vision), lua e tatau ona faia se tautinoga (declaration) ma le vaega mulimuli na ia saunoa ai e faapea o oe ma a’u e atoa ai le foa’i i le Atua.
O le luitau na faataatia e le susuga i le toeaina e le gata mo le ekalesia ae mo soo se tasi foi na auai ai i lea sauniga. Saunoa ai Fiti e ao ona tutu faatasi (unite) ma valaau i le Atua ma le loto atoa.
Na momoli foi le faamalo a le toeaina i le faafeagaiga ma le ekalesia ona o le galuega tele sa feagai ai. O le susuga i le toeaina o le EFKS i Aukilani i sauté, susuga Tanielu Mamea na saunia le tatalo o le sauniga.
O viiga, o se tasi lea o vaega aupito i taua i soo se sauniga ma e lei faatamala le faafeagaiga ma le ekalesia i lea itu, O viiga o le Atua na saunia e tamafanau lava a le ekalesia aemaise o le taitaiga a le susuga Peter Lee, o se tasi foi ua lava lona silafia i le itu tau musika ma o se alo faasino i le susuga i le faafeagaiga o le ekalesia lava lea i Ausetalia le susuga Seiuli Atipera Lee na malaga mai foi mo le faamoemoe.
O le pese o le salamo e 111 na faaiu ai le sauniga ma pepese faatasi ai le aofia i le agaga fiafia ma le faafetai ona o le faamoemoe ua taunuu o le laau lea o le soifua.
E pei lava ona masani ai lo tatou atunuu i aso faapenei, na tapena ai foi lava le ekalesia e le gata i le taumafataga tele na saunia ae o faaaloaloga na faia ina ua maea le sauniga o le faapaiaga. Taape ai le mamalu na aofia ma le mama ua lomi ma le vaa ua goto e pei o ia upu a le atunuu ona o le faaaloalo maualuga na alo iai le susuga i le faafeagaiga ma le mamalu o le ekalesia i Magele ina ua faia mea sili mo le Atua ma lona finagalo.
