Faapaia ma Umusa le Malumalu o le Ekalesia Katoliko a Melton

O le pitonuu o Melton i le aai o Melepone o se tasi o pitonuu ua iloga le televave o le tupu o le aofai o tagata e lolofi atu e nofoia ona faoā aai fou ma ua atili lautele ai lenei pitonuu.
Ua molimauina le toatele o le paia ma le mamalu o lo tatou atunuu ua faaopea ma aumau ai i Melton, ua faigofie ona iloga lea tulaga ona o le tele o Ekalesia Samoa ua amataina ma faamautu i le nuu.
O le Aso Toonai na mavae atu na vivii fiafia ai viiga o le Atua e le aufaipese Samoa a le Ekalesia Katoliko, ona o le tatalaina ma faapaiaina o lo latou malu fou. E ui ona o le Ekalesia papalagi, ae ua maitauina le toatele o tamalii ma le paia o Samoa o loo auauna ma tapuai ai i le Ekalesia.
O viiga uma o le aso tele na lagi fetailai e le aufaipese Samoa ma pese papalagi, ae na mataina le Faanofoaliiina o le Afioga a le Atua i tu ma aga i fanua faa-Samoa.
O le taitai o le sauniga o le susuga i le Akiepikopo Dennis Hart, o le malo faaaloalogia o le aso o le susuga ia Epikopo Moseniolo faatasi ai ma le toatele o afioga a Patele mai vaega eseese o Vitoria.
O loo faasuafaina le malu ma le Ekalesia o “Saint Catherine of Siena Church” o le ata foi lea na momoli mai e le Laei o le Aufaipese, o le lanu uliuli o le ata o le Ekalesia aoao a Vitoria, a o le lanu samasama o le ata o Saint Catherine.
O le itula e lima i le afiafi na tatala aloaia ai lenei sauniga ma faagasolo ai lava seia oo ina ta‘ape ma le fiafia ma le faamanū ia Ieova le faaao o le Ekalesia.
O nisi o tofiga ua iai le aufaipese Samoa o Taitai pese o le tofa ia Lilii Toma mai le afioaga o Leauvaa, ma le tofa ia Tupuola Pasitale mai afioaga o Moataa ma Siumu, ma le faipese o le afioga ia Taefu Siumalae Silao mai afioaga o Siufaga Falelatai ma Salelologa. Tau ina ia tele ni agaga e faatalaleleiina mo le Atua ma lona finagalo i totonu o le Ekalesia.