Ua iai nei se sa lapoa ua manatu le afioaga o Manono o le a tele le faamāmā avega i felauaiga ma femalagaaiga i le va o Manono-uta ma Manono-tai. O le igoa o le sa o le Uluai Pou o Malo – ua lautele atu i lo alia ia e faaaogā ai afi ua autausagā o faaaogā e tagata o le afioaga lenei o le Aiga i le Tai.
O se vaega o le soifuaga i aso faipea – pe a usuai mai i latou e mai i le motu i gatai e fia fai atu a latou faatauga o le aso i le pitonuu a uta. O vaa lava ua fesootai ai nei afioaga. O le afatia soo o lea itu o le Aiga i le Tai i ‘afa e pei foi ona iai le afā o Eveni na afatia ai Samoa i le faaiuga o le tausaga na tea nei, na molimauina ai loa le matua faaleagaina o vaa na faaaogā e le nuu mo ana femalagaaiga.
O sa nei sa totoe mai i le tsunami na faaleaga ai foi nisi o vaa a le afioaga. O lea na talosaga ai loa taitai o le afioaga mo se fesoasoani ma o le Aso Toonai lea na molimauina ai loa le tali mai o le faalapotopotoga na talia le talosaga a Manono. O lea poloketi na faatupeina e le Polokalame o Fesoasoani mo Sosaiete o Faalapotopotoga mo Tagata Lautele (CSSP) faatasi ai foi ma le fesoasoani a le afioaga lava ia. Na saunoa le Afioaga Leiataua Setefano e fai ma sui o le Komiti o Atinae a Faleū e faafetai i le lagolago atu o lenei foi faalapotopotoga faapea ai ma le pulupululima faatasi o le afioaga.
“E momoli atu le faamalō ma le faafetai i le CSSP ona o le taliaina o le talosaga a lenei afioaga. Ua sili atu le telē o le vaa lenei ma e talitonu o le a lē toe popole foi i se isi mea,” o le saunoaga lea a Leiataua. Na momoli foi le faafetai a le afioaga i le fesoasoani atu a le vaega a le Tineimu i le faatautaia lea o ni aoaoga mo le saogalemu o le lautele i luga o lenei vaa. E sili atu ma le fā nisi o ‘alia laiti na tautuaina le atunuu o loo nonofo ai i nei motu ma e $3.00 le pasese a le tagata e toatasi. ($6.00 i le sau ma le toe agai atu i aiga).
Na ta‘ua foi e Lei‘ataua e sili atu le fuainumera o tagata e mafai ona feaveai i le vaa fou lenei ua faaigoaina o le Uluai Pou o Malo. “O le uluai taimi foi lenei ua maua ai e le afioaga se vaa faapenei e patino lava i femalagaiga i le va o motu e lua, auā sa faaaogā lava ‘alia fagota i le tele o tausaga ua mavae ma na fai lava e nisi o aiga e ana vaa i le fausaga e mafai ona feaveai ai na o pasese ma e lei faaaogāina mo fagotaga,” o le faaopoopo mai lea a Leiataua.
O le susuga i le Faafegaiga ia Ioane Tauiliili na taitaia lea sauniga i se tatalo ma faapaia ai le sā fou o le afioaga. Na auai atu foi le Alii Komesina o le Pulega o Tali o Faalavelave Faafuasei ma Tinei Mū, ia Seve Tony Hill ma nisi o sui o le konekarate na fausia le vaa le Ark Marine and Engineering.
E valu masina na faia ai lea galuega mo le fausia poo le faapipii o totoga o le vaa ma o le aso foi lava lea na amata ai femalagaiga e tusa ai ma le faamoemoe na fausia ai.
O loo i lalo foi o le vaavaaiga a le Komiti o Atiana’e a Faleū le vaaiga lelei ma le aoina o seleni mai lea atinae ma o le faamatalaga foi a Leiataua o le a faaaogā lava lea seleni mo le penisini ma isi mea e moomia mo le faaleleia ma le faaauau ai o lenei atinae.
Na taualuga lea sauniga i le malaga a le Uluai Pou o Malo i Manono-tai. E silia ma le to‘a 50 nisi o le afioaga na mafai ona malaga ai ma na ta‘ua foi e Leiataua e sili atu se fuainumera e mafai ona ofi i le vaa lenei pe a faatusatusa i le tele o vaa na fai lenei tautua.
