Na faatumulia le Malumalu Sa a le Ekalesia a Iesu Keriso o le aupaia o aso e gata ai i Melepone i le Aso Toonai, aso 25 o Aukuso, lea na faapaiaina ai, le ulugalii fou le susuga ia Alai Ianusi o Asau ma Sagone, ma lana manamea, le lalelei o Christina Fuimaono mai afioaga o Salani ma Afega.
Na faatumulia le sauniga i aiga na lua, uo ma aumea mamae ma Samoa potopoto e molimauina le tuufaatasia o i laua i le sakalameta paia, na mae‘a ona feagai ai lea ma le taumafataga tele na faia i le malu o le Ekalesia i Deer Park, lea na molimauina le faatumulia foi ona o le alofagia o nei alo o le Ekalesia ma le atunuu.
O le tofa ia Moe Lafaele Pasi na fai ma fofoga o le aso, auā le paia o le Aufaigaluega totofi a le Atua, tainane tupu ma tamaalii ma le mamalu o le auvalaaulia na afifio ma talaaao atu e lagolago ma molimoli faamanuiaga o le aso faapitoa o le ulugalii fou.
O se aso matagofie ma felanulanuai ona e lē gata i le talalelei, ae o tu ma le faaaloalo faa-Samoa e masani ai mo aso faapea, ae laualuga i laufofoga fiafia ma le tausaafia o aiga na lua, aemaise lava o le ulugalii fou.
O le fofoga o le tofa a Aumua Eneliko na fai ma sui o Samoa potopoto e molimoli se faafetai i aiga na lua mo faaaloaloga ma faaleo se faamanuiaga a Samoa mo le aiga fou.
E lē taumate manuia o le Atua o le a faamanuiaina ai Alai ma Christina ona o lea na molimauina le alofagia o lo la aso fiafia. Faamanuia tele le Atua i le aiga fou, ma ia fua tele le niu.
